Масаллиқлар: 600 грамм ун, 2 та тухум, 1 стакан сут, 100 грамм шакар, 300 грамм сариёғ, озгина туз, 2 чойқошиқ хамиртуруш. 

Тайёрланиши: 
Стаканга хамиртуруш, бир ошқошиқ шакар ва озгина сут солиб аралаштириб 10 дақиқа дам берамиз. Каттароқ идишга унни элаб, туз, қолган ­шакарни ва тухумларни чақиб соламиз. Кейин хамиртурушли массани солиб, аралаштириш жараёнида сутни қўшамиз. 10 дақиқа қорамиз, қўлга ёпишмайдиган юмшоқ хамир бўлиши керак. Бир соатга ошириш учун қўйиб қўямиз, бу орада 300 грамм сариёғни елим пакетга солиб, жўва ёрдамида тўртбурчак қилиб ёямиз ва музлатгичга қўямиз. Ошган хамиримизни ҳалиги сарёғ ҳажмидан икки баробар каттароқ ёямиз. Сариёғни хамиримизнинг яримига жойлаймиз, ярмини устидан ёпиб, четларини букиб чиқамиз. Кейин жўва билан 60 х 20 сантиметр қилиб ёямиз, кейин учдан бирини букамиз, қолган учдан бирини ҳам букамиз ва елим пакетга ўраб музлатгичга 30 дақиқага қўямиз.
Шу жараённи уч маротаба такрорлаймиз. Ва ниҳоят тайёр бўлган хамиримизни ун сепилган стол устига энига 18-20 сантиметр, бўйига 80-100 сантиметр, қалинлиги 0,5 сантиметрқилиб ёямиз. Узунчоқ учбурчаклар қилиб кесиб оламиз ва рогаликка ўхшатиб ўраймиз. 30 дақиқа кўтарилиши учун қолдирамиз ва 180-200 даража қизиган духовкага солиб, усти қизаргунча пиширамиз. Пишгач, сиропга ботириб оламиз.
Ёқимли иштаҳа!