Аҳоли фикри ва мунособати ниҳоят инобатга олинди. Маълумки, Ўзбекистон Республикаси Вазирлар Маҳкамасининг «Йўл ҳаракати хавфсизлигини таъминлаш тизимини такомиллаштириш бўйича қўшимча чора-тадбирлар тўғрисида»ги қарори сабаб кўплаб эътирозлар юзага келган эди. «Оила даврасида» газетасида ҳам бу мавзуда бир нечта мақола эълон қилинди.

Ҳукуматнинг «Йўл ҳаракати хавфсизлигини таъминлаш бўйича қўшимча чора-тадбирлар тўғрисида»ги қарори қабул қилинди. Унда йўл ҳаракати барча иштирокчиларининг ҳуқуқ ва манфаатлари эътиборга олинган амалий чоралар белгиланди.
Эндиликда 2021 йил 1 январга қадар куннинг ёруғ вақтида яқинни ёритувчи чироқлар ёки кундузги сигнал чироқларини ёқиб ҳаракатланиш шартлиги бўйича талаб автоматик ёниб турувчи кундузги сигнал чироқлари билан жиҳозланмаган автомототранспорт воситаларига нисбатан татбиқ этилмайди.

Стандарт — ишлаб чиқарувчиларга
Автомобиль ишлаб чиқарувчилар учун талаблар қатъийлаштирилди. 
■ 2020 йил 1 январдан мамлакатимизда ишлаб чиқариладиган барча автомобиллар ички бозорга ишлаб чиқарувчи томонидан автоматик ёниб турувчи кундузги сигнал чироқлари билан жиҳозланган ҳолда чиқарилади.
■ Импорт қилинадиган автомототранспорт воситаларида кундузги сигнал чироқларининг мавжудлигини сертификациядан ўтказиш мажбурийдир.

«Штраф» камайтирилади
Маъмурий жавобгарлик тўғрисидаги кодексга ҳайдовчиларнинг куннинг ёруғ вақтида транспорт воситаларининг яқинни ёритувчи чироқларини ёқиб ҳаракатланмагани учун жавобгарликни енгиллаштиришни назарда тутувчи ўзгартиришлар киритиш бўйича таклифлар ишлаб чиқилади.

Чироқ қачон ёқиб юрилади?
Автомобиллар қуйидаги ҳолатларда чироғини ёқиб юришга мажбур:
■ транспорт воситалари ташкилий жамланма (колонна) сафида ҳаракатланаётганда;
■ йўловчиларни ташиётган автобус ва йўналишли транспорт воситаларида;
■ болалар гуруҳини ташкилий ташишда;
■ хавфли, катта ўлчамли ва оғир вазнли юкларни ташишда;
■ механик транспорт воситаларини шатакка олишда (шатакка олиб кетаётган транспорт воситасида);
■ мотоцикл ва мопедларда.