Ҳаётдан нолиб, ҳамма нарсадан камчилик излаб, қачон қарасанг, иши юришмаганидан тушкун кайфиятда юрадиганлар йўқ эмас. Одамларнинг яна бир тоифаси борки, ҳаракатчан, изланувчан ва ташаббускор бўлиб, эзгулик ҳисларини бошқаларга улашиб яшайди. Энг яхши ғоялар, янгича фикрлар ҳам ана шундай кишилардан туғилади, аслида.

Кўз илғамайдиган арзимаган нарсалардан ҳам кишини қувонтирадиган бежирим ижод маҳсули яратиш эса ҳақиқий ижодкорга хос сифатлардан бири. 
— Тошкент архитектура-қурилиш институти магистратура босқичининг ландшафт дизайни йўналишини битирганман, — дейди Феруза ­ТОШМУҲАММЕДОВА. — Турмушга чиққанимдан сўнг, барча келинлар сингари оиладаги вазифаларим ортиб, кундалик юмушларга шўнғиб кетдим. Бироқ менда янгича истак пайдо бўлди. Уйда ўтириб ёки ишдан ташқари бўш вақтларда фойдали ва қизиқарли машғулотлардан бири тўғрисида ўйлай бошладим ва топдим. Ҳар ким қила оладиган, айниқса, уй бекалари учун сердаромад иш бу — «hand made», яъни қўлда ясалган буюмлардир. Булар қаторида қўлда ясалган гуллар, 3D шаклидаги гулли сурат-портретлар, турли манзаралар, эсдалик буюмларни санаб ўтишим мумкин.
Аввалига, интернетдан ўрганиб, кичик-кичик нарсалар ясай бошладим. Қилган ишларимни бир четга олиб қўярдим. Чунки атрофдагиларга кўрсатишга бироз ийманардим. Бир куни яқин қариндошимизнинг туғилган кунига тўсатдан борадиган бўлиб қолдик. Нима совға олишни билмай бошимиз қотиб турган эди, шунда ўзим ясаган ижодий ишлардан бирини олиб, туғилган кун эгасига туҳфа қилдик. Йиғилган меҳмонларнинг ҳам ҳаваси келиб, бир-бир қўлларига олиб, томоша қилишди. Ўша воқеа мени руҳлантирди ва ўз устимда жиддий ишлай бошладим. Ҳозир хотин-қизларга билганларимни бўлишиб келаман, 80 дан ортиқ шогирдим бор.
Феруза опа айни пайтда Низомий номидаги Тошкент давлат педагогика университетининг Касб таълими факультети «Меҳнат ва дизайн» кафедрасида фаолият юритади. Қолаверса, келгусида имтиёзли кредит асосида бизнес юритишни режалаштирган.
— Кун сайин мижозлар ортиб боряпти, — дейди қаҳрамонимиз. — Иш бошлашдан аввал, ҳар бир харидорнинг талаб ва истакларини сўраб оламан. Мижознинг кўнглига ёқадиган нарса чиқиши учун бу жуда муҳим. Унга маъқул келмагунча мен ҳам тинчимайман, бошқатдан ясаб беришга тўғри келса-да, меҳнатдан қочмайман. Даромад ҳам шунга яраша бўляпти. Бу ҳунарни ўрганиб олишни уй бекаларига, талаба-қизларга тавсия қилган бўлардим.
Наргиза ЮНУСОВА