Сенатнинг ўн еттинчи ялпи мажлисида «Ўзбекистон Республикасининг айрим қонун ҳужжатларига жамоат тартибини таъминлаш механизмларини такомиллаштиришга қаратилган ўзгартиш ва қўшимчалар киритиш тўғрисида»ги Қонун маъқулланди. ​​​​​​​

Ҳужжатда, ишга қабул қилинишда барча фуқароларнинг ҳуқуқлари тенглаштирилди. Эндиликда ишга қабул қилинишида, ходимнинг вақтинчалик ёки доимий пропискаси талаб қилинмайди. 

Яъни, Ўзбекистон Республикасининг Меҳнат кодексидан ишга кираётган шахс вақтинча ёки доимий пропискасиз ёхуд турган жойи бўйича ҳисобда турмаган бўлса, уни ишга қабул қилишни рад этиш мумкинлиги ҳақидаги қоида чиқариб ташланди.

Шунингдек, Маъмурий жавобгарлик тўғрисидаги кодексдан вақтинча ёки доимий пропискасиз яшаб турган фуқароларни ишга қабул қилганлик учун иш берувчини (мансабдор шахсни) маъмурий жавобгарликка тортишга асос бўлувчи модда чиқариб ташланди.

Муқаддам ушбу тартиб билан ходимни пропискасиз ишга қабул қилгани учун корхона ёки ташкилот раҳбарига энг кам иш ҳақининг ўн бараваридан ўн беш бараваригача (2 027 300 – 3 040 950 сўм) миқдорда жарима солинар эди.

* * *

Ўн олти ёшга тўлиши муносабати билан ўз вақтида паспорт олмаганлиги учун маъмурий жавобгарликка тортилмаслиги белгиланди (бунинг учун 18 ёшга қадар паспорт олиш керак).

Изоҳ:

Муқаддам фуқаро биринчи марта паспорт олиш учун мурожаат қилган пайтда, унинг ёши 16 дан ошган бўлса (бир неча кун ўтиб кетган бўлса ҳам), энг кам иш ҳақининг уч бараваригача миқдорда жарима солишга сабаб бўларди. Оқибатда жаримани тўлолмаган кам таъминланган оила фарзандлари йиллаб паспорт оломасдан сарсон бўлишарди. Эндиликда бу адолатсизликка барҳам берилди.