Электр қувватидан тежаб фойдаланиш тобора долзарб аҳамият касб этмоқда. Мазкур жараёнда, айниқса, светодиод лампаларининг ўрни беқиёс.

Бу лампалар электрни кам сарфлаши ҳамда узоқ ишлаши билан истеъмолчиларга манзур. Шунинг учун ҳам мамлакатимиздаги аҳоли хонадонларининг қарийб 25-30 фоизи ана шундай чироқлардан фойдаланмоқда.

— Аслида мавжуд электр қувватидан оқилона фойдаланиш қатор омилларга амал қилишни тақозо этади, —  дейди ­«Ўздавэнергоназорат» инспекцияси бошлиғи ­Дадажон ИСОҚУЛОВ. — Булар сирасига ўрнатилган электр энергиясини қабул қилувчи ускуналарнинг технологик жараёнларга нисбатан тўғри танланганлиги ва бугунги замон талабига жавоб бериши, эскирган ускуналардан воз кечишни келтириш мумкин.

— Электр, иссиқлик энергиясини ишлаб чиқариш, узатиш, истеъмол қилишда ва кўмирдан фойдаланишда хавфсизликни таъминлаш борасида қандай чоралар кўрилмоқда?

— Ўтган тўққиз ой давомида инспекция назорати остида «Ўзбекэнерго» АЖ тасарруфидаги 105 та объектда назорат тадбирлари ўтказилди. Мазкур текширишлар натижасида 2925 та қоидабузарлик ҳолати аниқланди. Техника қоидаларини писанд этмай, ўз билганича иш олиб борган 52 та бригада иши тўхтатилди. Инсон ҳаёти учун хавфли бўлган 203 дона электр ускунаси тармоқдан узиб қўйилди. Қонунбузилишига йўл қўйган мансабдорлардан 51 нафарига чоралар кўрилди.

— Бир хонадон йил давомида қанча электр энергиясини тежаши мумкин?

— Битта хонадон бир йилда ўртача 400 кВт/соат электрни тежаб қолиши мумкин. Албатта, бир қарашда, рақам катта эмас. Лекин 400 кВт/соатдан ҳар бир хонадон тежаса, республика бўйича 1,8 миллиард кВт/соатни ташкил этади. Бу электр энергияси билан Жиззах ёки Сирдарё вилоятларини бир йил давомида таъминлаш мумкин. Баъзида телефонимизни қувватлантиргандан сўнг ҳам, қувватлантиргични электрдан узиб қўймаймиз. Аслида бу нотўғри. У барибир токни ўзига тортиб олаётган бўлади.

Улуғбек ЖУМАЕВ,

«Оила даврасида» мухбири