Сўнгги пайтларда ҳудудларда кўп қаватли уйлар, якка тартибдаги уй-жойларни иситишда табиий ва суюлтирилган газ, қаттиқ ёқилғидан фойдаланишда хавфсизлик қоидаларига риоя этмаслик ҳолатлари кўп учрамоқда.

Оқибатда хонадонларда ёнғин ёки ис газидан заҳарланиш ҳолатлари рўй бериб, одамлар ҳаёти ва саломатлигига жиддий зарар етмоқда. Уларнинг аксарияти табиий газ ва муқобил ёқилғи турларидан ҳамда печлардан фойдаланишда техник ва ёнғин хавфсизлиги қоидаларига риоя этилмагани, табиий газ тармоғига нотўғри уланиш, иситиш мақсадида газ плиталарини ёқиб қўйиш ҳамда дудбуронларнинг носозлиги оқибатида келиб чиқмоқда.

Бу каби салбий ҳолатларнинг олдини олиш мақсадида Вазирлар Маҳкамасининг «Аҳоли хонадонларида иситиш тизими ва ёқилғи маҳсулотларидан фойдаланишда хавфсизлик талабларига риоя этилишини таъминлаш чора-тадбирлари тўғрисида»ги қарори қабул қилинди.

Қарорга мувофиқ иситиш тизими ва ёқилғидан фойдаланишда хавфсизлик талабларига риоя этилишини ўрганиш мақсадида, хонадонларнинг ички газ тармоқлари ҳамда газда ишловчи қурилма ва ускуналар қуйидаги муддатларда техник тафтишдан ўтказилади:

■ кўп квартирали уйлардаги газ плиталари (бошқа газ приборлари мавжуд бўлмаганда) – икки йилда бир марта;

■ якка тартибдаги тураржойлардаги газ плиталари, иситиш, сув иситиш приборлари – бир йилда бир марта; 

■ профилактик хизмат кўрсатиш – ҳар йилги иситиш мавсуми бошланишидан аввал;

■ тураржойлардаги дудбурон ва вентиляция каналлари – ҳар йилги иситиш мавсумидан олдин.

Текширувлар натижасида ички газ тармоқлари, газда ишловчи қурилма ва ускуналар, дудбурон ва вентиляция каналларининг созлиги далолатнома билан қайд этилади. Шунингдек, газ таъминоти ташкилоти истеъмолчиларга газ приборларидан хавфсиз фойдаланиш бўйича эслатма топширади. Эслатмада газ таъминоти ташкилотининг авария хизмати телефон рақамлари қайд этилади.

Солиқ органлари қўлбола усулда ясалган но­стандарт иситиш мосламаларини ишлаб чиқариш ҳамда уларнинг бозорлар ва турли савдо шохобчаларида сотилишининг олдини олиш бўйича рейдлар ўтказади.

Газ таъминоти ташкилоти тасдиқланган тарифлар бўйича истеъмолчиларнинг ёзма ёки электрон буюртмалари асосида газдан фойдаланиш ускуналарини қуйидаги муддатларда таъмирлайди:

► табиий газ сизиб чиқишида — дарҳол;

► овқат тайёрлаш учун мўлжалланган газдан фойдаланиш ускуналарининг носозлигида — бир кун давомида;

► иситиш мавсумида иситиш учун мўлжалланган газдан фойдаланиш ускуналарининг носозлигида — бир кун давомида;

► иссиқ сув ва иситиш учун мўлжалланган газдан фойдаланиш ускуналарининг носозлигида (иситиш мавсумидан ташқари вақтда) — икки кун давомида;

► газдан фойдаланиш ускуналарини алмаштиришда — беш кун давомида.