Дейлик, бирор тадбиркорликни йўлга қўймоқчисиз. Бунинг учун эса, албатта, қанчадир миқдорда маблағ зарур.

Аммо ўша маблағ сизда бўлмаса ёки пулингиз режани амалга оширишга етмаса, қандай йўл тутасиз? Бунинг йўллари кўп, албатта. Масалан, банк кредити бунда жуда асқотади.

Бироқ тадбиркорликни йўлга қўйишдан ва банкдан кредит олишдан олдин баъзи ҳолатларга аниқлик киритиб олиш лозим. Дастлаб, кредитни нима учун олмоқчисиз ва маблағ нимага йўналтирилади, деган саволга жавоб топиш керак. Шунингдек, олинган кредит муддатида қайтарилиши лозим. Агар юқоридаги саволларга жавоб берган бўлсангиз, демак, кредит олишнинг шартлари билан батафсилроқ танишишга ва уни олишга тайёрсиз.

Мамлакатимизда кичик бизнес ва хусусий тадбиркорлик соҳаси вакилларини қўллаб-қувватлаш юзасидан қатор ислоҳотлар амалга оширилмоқда. Бунда банкларнинг жуда муҳим ўрни бор.

Ҳозирда банклар иқтисодиётнинг барча тармоғига, хусусан, саноат, қурилиш, транспорт, алоқа ва таъминот корхоналари ва ташкилотларига, кичик бизнес ва хусусий тадбиркорлик соҳасига комплекс молия-кредит хизматларини кўрсатмоқда. Бу эса иқтисодиёт янада ривожланиб, равнақ топади, турмушимизда фаровонлик ошади, дегани.

— Кичик бизнес субъектларига жорий йилнинг 1 апрелига қадар 255,3 миллиард сўм миқдорида кредит маблағлари ажратилди, — дейди «Ўзсаноатқурилишбанк» Кредит операциялари департаментининг Қисқа муддатли кредитлаш бўлими бошлиғи Жасур БОЛТАЕВ. — Хизмат кўрсатиш ва сервис соҳасини ривожлантириш бўйича — 24 миллиард, касб-ҳунар коллежлари битирувчиларининг тадбиркорлик фаолиятини ривожлантиришга — 3,6 миллиард, оилавий тадбиркорлик соҳасига 3,5 миллиард сўм миқдорда кредит маблағлари ажратилди. Бугун банкимизнинг жами 44 филиали, 38 минибанки, 48 жамғарма, 188 га яқин махсус кассаси ва бошқа шохобчалари фаолият кўрсатмоқда. Мижозларимиз сони эса бир миллиондан ошган.

Шунингдек, банк томонидан кичик бизнес ва хусусий тадбиркорлик вакилларига 2016 йилнинг 1 апрелига қадар 28,6 миллиард сўм миқдорида микрокредитлар берилган.

Нурпўлат НУРҚУЛОВ,

«Оила даврасида» мухбири