Аксарият истеъмолчилар, ички бозорга чиқариладиган маҳсулотлар сифати устидан жиддий назорат ўрнатилишини истайди. Аммо сифатсиз маҳсулот бозорда истаганча топилади. Хўш, нега?

— Корхонамиз зиммасига мувофиқликни баҳолаш соҳасида давлат сиёсатини амалга оширишда иштирок этиш, мувофиқликни баҳолаш органлари метрология хизматларини аккредитация қилиш ва улар фаолияти устидан ва инспекцион назорат ўтказиш, халқаро ва миллий аккредитация органлари билан фаол ҳамкорлик қилиш вазифаси юклатилган, — дейди «Ўзбекак­кредитация» давлат корхонаси директори Ансадхон ЗАКИРОВ. — «Ўзстандарт» агентлиги тизимида фаолият кўрсатаётган марказимиз томонидан ўтказилган инспекцион таҳлил натижаларига кўра, шу кунга қадар мувофиқликни баҳолаш идоралари томонидан 141,5 миллиард сўмлик маҳсулот номувофиқ, деб топилди.

— Номувофиқ деб топилганлар ичида қайси турдаги маҳсулотлар кўп учрайди?

— Аксар қисми озиқ-овқат, қурилиш, косметика, машинасозлик, дори-дармонлар ҳиссасига тўғри келмоқда.

— Хориждан келтирилган дори-дармонлар истеъмол учун яроқсиз деб топилса, қандай йўл тутилади?

— Инсон ҳаёти учун хавф туғдирадиган барча турдаги дори-дармонлар зудлик билан ишлаб чиқарилган давлатга қайтариб юборилади. Агар мамлакатимизда тайёрланадиган дори-дармонлар билан боғлиқ шундай ҳол содир бўлса, корхона фаолияти вақтинча тўхтатилади. Бу маҳсулот сифати яхшилангунга қадар давом этади.

— Озиқ-овқат маҳсулотлари йил давомида неча марта текширувдан ўтказилади?

— Бир йилда икки марта. Қолган вақтда буни корхона раҳбариятининг ўзи назорат қилади.

— Яқинда Ўрикзор бозорида ўта хавфли касаллик аломатлари бор ўйинчоқ сотилаётгани аниқланибди...

— Чиндан ҳам, бозорда сотилаётган болалар ўйинчоғида саратон касаллигини келтириб чиқарувчи хавф мавжудлиги аниқланган. Ўша ўйинчоқнинг ишлаб чиқарилган манзили, мувофиқлик сертификати йўқ эди. Бундай пайтда ҳеч ким масъулиятни зиммасига олмайди. Истеъмолчи эса, азият чекади.

— Бозорларда жаҳон стандарти талабларига мутлақо жавоб бермайдиган, кўплаб қурилиш материалларига кўзингиз тушади...

— Ҳақиқатдан ҳам, сиз айтган ҳолат мавжуд. Сотилаётган аксар қурилиш материалларининг сифати ҳар доим ҳам кўнгилдагидек бўлавермайди. Булар ичида қурилишда ишлатиладиган сувоқ материаллари кўп. Шу кунга қадар истеъмолчилардан 35 мингта маҳсулот сифати талабга жавоб бермаслиги, ишлаб чиқарилиши, кўриниши борасидаги эътирозлар келиб тушган. Ҳозирда бунинг сабаблари жиддий ўрганилмоқда.

Улуғбек ЖУМАЕВ

тайёрлади.