Қолганини меҳнат қилиб топяпмиз

Чорвачилик аҳолининг сут, гўшт маҳсулотларига бўлган эҳтиёжини қондирадиган жуда муҳим тармоқ. Уни янада ривожлантириш, такомиллаштириш бугунги куннинг талаби.

Оҳангарон тумани Мўмин­обод қишлоғидаги Ойбек Холтўраев раҳбарлик қилаётган «Холтўраев Ойбек ХМ» фермер хўжалиги чорвачиликка ихтисослашган. Отамерос касб билан бутун сулола шуғулланади.

— Ўзим олий маълумотли зоотехникман, — дейди фермер хўжалиги аъзоси Абдували ХОЛТЎРАЕВ. — Ота-боболаримиз чорвадор бўлишган. Мана, биз давом эттиряпмиз. Хўжалигимизга укам Ойбек раҳбарлик қиляпти.

— Қандай чорва боқасиз?

— Асосан, қўй, эчки ва от. Рўзғорнинг сут-қатиғи, мойи, тухуми учун қорамол, парранда ҳам боқамиз, албатта. Бироқ уларнинг сони кўп эмас. Қўйнинг «Жайдари қора» ва «Жайдари оқ» зотларини боқяпмиз. Ҳозирда уларнинг сони 5 минг бошга етган. Эчкиларнинг «Ангор қора», «Ангор оқ» ва серсут маҳаллий қора зотлари боқилмоқда. Уларнинг ҳам сони 5 минг бошдан ошди. «Қорабайир» от зотидан эса 300 бошини парваришлаяпмиз.

— Бунча чорва учун жуда катта ем-озуқа базаси керак, шундайми?

— Ем-озуқа базаси учун шароит етарли. Бунинг учун экин майдонларимиз, ўралган катта-катта табиий яйловларимиз ва қишлоқ хўжалиги техникаларимиз бор. Қўй-эчкиларни яйловларга асосан, кузда ёйишга ҳаракат қиламиз. Чунки бу пайтда яйловда ўсадиган ўсимликларнинг уруғлари ерга тўлиқ тўкилиб улгурган бўлади. Бу янаги йилда ҳам ўт-ўлан мўл бўлишига хизмат қилади. Қўй-эчкилар туёғи тўкилган уруғларни босиб «экишга» ёрдам берса, қумалоқлари табиий ўғит вазифасини ўтайди.

— Хўжаликда қанча киши ишлайди?

— 40-50 киши доимий иш билан банд. Улар ҳар ой ўртача 800 минг сўм маош билан таъминланган.

— Семиртирилган қўй-эчкиларнинг вазни қанчага етади?

— Яхши боқилса, совлиқ 80-90, қўчқор 120 килограммгача тош босади. Эчки 50-60, эркаги 70 килограмм ва ундан кўп вазнга эга бўлиши мумкин.

— Ўтган йили даромад қандай бўлди?

— Аниқ рақамларда айтолмайман-у, лекин тахминан 1 миллиард сўмдан зиёд даромад қилдик. Оиламиз катта. Чорвачиликдан келадиган даромад ҳисобига хўжаликни ривожлантиряпмиз. Қолаверса, уйлар қурдик, тўйлар ўтказдик.

— Галдаги режалар қандай?

— Замонавий ўт ўрадиган машина сотиб олиш ниятидамиз. «Жайдари оқ» зотли қўйлар сонини 10 минг бошга етказишни кўзлаяпмиз. Эчки сутидан пишлоқ ишлаб чиқаришни янада такомиллаштирамиз. Хорижий сайёҳлар отда тоғларда сайр қилиши учун «От туризми»ни йўлга қўймоқчимиз. Наслчилик заводини ташкил этишни ва олинган наслли қўчқорларни кимошдида сотишни режалаштиряпмиз. Бу борада Ўзбекистон Республикаси Чорвачилик ва паррандачилик илмий-тадқиқот институти олимлари билан ҳамкорлик қилмоқдамиз.

Нурпўлат НУРҚУЛОВ

ёзиб олди.