Тадбиркорлар учун қулай муҳит яратилиб, уларга имтиёзлар тақдим қилинаётгани туфайли янги иш ўринлари яратилмоқда ва аҳоли турмуш фаровонлиги ошмоқда.

Яккабоғ туманидаги «Delta muhandis» масъулияти чекланган жамиятида мева-сабзавотлардан ишлаб чиқарилаётган турли шарбатлар юқори сифатлилиги ва хуштаъми билан харидорларга манзур бўляпти.

Илгари мева-сабзавот маҳсулотлари улгуржи савдоси билан шуғулланган мазкур корхонада тадбиркорлик субъектларига яратилаётган имтиёз ва қулайликлардан фойдаланиб, мева-сабзавотларни қайта ишлаш йўлга қўйилди. 2016 йил сентябрь ойида тижорат банкидан олинган 400 миллион сўм имтиёзли кредит ва тадбиркорнинг ўз маблағлари ҳисобига 1 миллиард 200 миллион сўмлик лойиҳа амалга оширилди. 14 ишчи меҳнат қилаётган корхонада айни пайтда қовоқ, олма, лавлаги, узумдан 1,5 ва 3 литрли аксептик пакетларга қадоқланган 6 турдаги шарбат ишлаб чиқарилмоқда.

— Цехимиз Австриядан келтирилган замонавий техника ва ускуналар билан жиҳозланган, — дейди «Delta muhandis» масъулияти чекланган жамияти раҳбари Низомиддин АЛИЕВ. — Бир кеча-кундузда 12 тоннагача мева-сабзавотни қайта ишлайдиган ушбу ускуналардан унумли фойдаланишга, маҳсулотимиз сифатини янада яхшилаш ва турини кўпайтиришга ҳаракат қилмоқдамиз. Боиси, бугунги истеъмолчининг диди нозик, танлаш имконияти кенг. Шундай экан, фаолиятни мунтазам такомиллаштириб бориш тадбиркорликнинг биринчи талабидир.

Дарҳақиқат, корхона жамоаси бозор талабларини ҳисобга олган ҳолда Хитойдан қиймати 90 минг долларлик 1 ва ярим литрли ҳажмда шарбатни қадоқлайдиган ускуна келтирилди. Бу маҳсулот тури ва харидоргирлигини оширишга хизмат қилмоқда.

— Хомашёни фермер хўжаликларидан шартнома асосида оляпмиз, — дейди корхона иш бошқарувчиси Олим ТУРДИЕВ. — Бундан ташқари, деҳқон ва шахсий томорқа хўжаликларидан ҳам мева-сабзавотлар харид қилинмоқда. Келажакда ишлаб чиқариш ҳажмини янада ошириш мақсадида 2 гектар майдонда боғ ҳам ташкил этдик. У ерга беҳи, шафтоли каби мевали дарахтлар кўчатлари ўтқазилган.

Ўлмас БАРОТОВ

ЎзА мухбири