ёки томорқадан зўр фойда топаётганлар

Фарғонанинг Олтиариқ, Риштон, Бешариқ, Қува сингари туманлари қишлоқларида кўплаб оилалар кафтдек ердан ҳам самарали фойдаланиб, оиласини фаровон қилмоқда, бозорни арзон ва сифатли қишлоқ хўжалиги маҳсулотлари билан таъминламоқда.

Уларнинг сири нимада эканини биласизми?

Чиндан ҳам, бугун ишнинг кўзини биладиган, меҳнатдан қочмаган, томорқасидан унумли фойдаланган киши баракага эришмоқда. Олтиариқ тумани ҳақида сўз борганда «Томорқадан зўр фойда топадиганлар», дейишади. Қиш фасли бўлса ҳам, бекорчи одамни учратмайсиз. Кимдир турп, сабзи экаётган бўлса, бошқаси кўчат парвариши билан банд. Аҳоли, айниқса, кўкат, лимон, помидор, булғор қалампири, бодринг етиштиришнинг ҳадисини олган.

— Бу бор гап, томорқачилик тўкин-сочинлик, фаровонлик манбаи, — дейди «Янгиқўрғон» маҳалла фуқаролар йиғини раиси Рустам КАРИМОВ. — Аксарият хонадонлар кичкина томорқасидан йилига уч-тўрт бор ҳосил олмоқда. Бугун деҳқончиликнинг самарали усуллари тез оммалашяпти. Томорқада, асосан, эртапишар картошка, карам, помидор, сабзи, пиёз ва турли кўкатлар етиштирилади. Жорий йилнинг ўзида 15 хонадонда лимончилик йўлга қўйилди. Камчиқим, аммо сердаромад ҳосил олишнинг ушбу интенсив усули ортидан тўкин яшаётган миришкорлар кўпаймоқда.

Ушбу маҳаллада яшовчи Юрсинали Замоновлар оиласи томорқадан унумли фойдаланишда кўпчиликка намуна. Хонадон эгалари томорқада асосан сабзавот, кўкат етиштиради. 10 сотих иссиқхонада эса лимон етиштириш йўлга қўйилган. Бу йил томорқадан 15 миллион сўмдан зиёд фойда олинди.

— Келгусида помидор етиштиришни ҳам режалаштир­япмиз, — дейди томорқачи Юрсинали ЗАМОНОВ. — Бундан уч-тўрт йил олдин иссиқхонамиз кичкина эди. Уни кенгайтириб, экин турини кўпайтирдик. Ҳозир шунинг орқасидан рўзғоримиз бут. Невараларимни ўқитяпман. Янги иморат солдик. Оиламиздаги файз-барака эса, ҳалол меҳнатимиздан. Фақат меҳнатдан қочмаслик керак.

Агар йил давомида ердан уч мартагача ҳосил олиш мумкинлиги ҳисобга олинса, томорқа чинакам хазина эканига шубҳа қолмайди. Маҳсулот қанча эрта етиштирилса, уни қимматроққа сотиш ва кўпроқ даромад олиш имконияти ҳам шунча ошади. Буни яхши англаган уддабурон томорқачилар эса, экинни плёнка остига экиш, иссиқхона шароитида парваришлаш технологиясидан кенг фойдаланмоқда.

Маъсуджон СУЛАЙМОНОВ,

(ЎзА)