Фарғона вилоятида асал­аричиликнинг тобора ривожланиб бориши ички бозорни арзон, сифатли маҳсулот билан таъминлашга хизмат қилмоқда ва тўйимли табиий неъмат ишлаб чиқаришни кенгайтиришда муҳим омил бўлмоқда.

Вилоят асаларичилар уюшмаси томонидан соҳани янада ривожлантириш борасида кенг кўламли ишлар амалга оширилмоқда. Уюшма бугун 1 минг 200 дан ортиқ малакали мутахассисни сафига бирлаштирган. Улар оила аъзолари билан бирга 1500-2000 тагача она ари парвариш қилиб, юқори маҳсулот ва истиқболли насллар етиштирмоқда. Бундан икки йил илгари вилоят бўйича минг тоннага яқин асал етиштирилган бўлса, жорий йилда бу кўрсаткични 1 минг 700 тоннадан ошириш режалаштирилган.

— Аҳолини сифатли асал билан таъминлашдан ташқари, хориждан келтирилган наслли асалариларни кўпайтириш, асалари билан чанглатиш орқали қишлоқ хўжалиги экинлари ҳосилдорлигини ошириш ҳам мақсад қилинган, — дейди вилоят асал­аричилар уюшмаси раиси, қишлоқ хўжалиги фанлари номзоди Шерали ­СУЯРҚУЛОВ. — Бу соҳада илмий изланишларни кўпайтириш билан бирга, хорижий давлатлар мутахассислари билан ҳамкорлик ҳам йўлга қўйилган. Улар тажрибасини ўрганиш ва амалда кенг қўллашга алоҳида эътибор қаратилмоқда.

Вилоят асаларичилар уюшмаси қошида ташкил этилган ишлаб чиқариш ўқув марказида ёш асаларичиларга касб сирлари ва унинг илмий асослари ўргатилмоқда.

Фарғона тумани технология касб-ҳунар коллежида асаларичилик соҳаси бўйича мутахассислар тайёрлайдиган йўналиш ташкил этилган бўлиб, ўқувчилар ўқув марказида назарий билимини амалиёт билан мустаҳкамлашмоқда. Фарғоналик мутахассислар кейинги йилларда Исроил давлатидаги ҳамкасблари билан тажриба алмашишни йўлга қўйди. У ерда экинларни чанглатиш орқали сифатли асал ва юқори ҳосил олиш технологияси жуда яхши ривожланган. Бу тажриба яхши ўрганилиб, вилоятда кенг жорий этилмоқда.

Маъсуджон СУЛАЙМОНОВ,

ЎзА мухбири