Аҳоли ҳамда кичик бизнес ва хусусий тадбиркорликка микрокредитлар ажратиш уларни молиявий қўллаб-қувватлашнинг самарали механизмларидан биридир.

Миллий матбуот марказида бўлиб ўтган анжуманда тадбиркорликни ривожлантиришда микрокредитлашнинг ўрни ва аҳамияти ҳақида сўз юритилди. Журналистларнинг соҳага оид саволларига мутахассислар томонидан жавоблар берилди.

— Микрокредитлашга оид норматив-ҳуқуқий ҳужжатларнинг янгидан қабул қилиниши, такомиллаштириб борилиши, соддалаштирилиши тадбиркорларга сифатли молиявий хизмат кўрсатиш имкониятини туғдирмоқда, — дейди Ташқи иқтисодий фаолият Миллий банкининг Стратегик ривожлантириш департаменти бўлими бошлиғи Бегзод ­РАҲИМОВ. — Бу эса, ўз навбатида, аҳоли бандлигини таъминлаш ҳамда фаровонлигини оширишга хизмат қиляпти.

— Тадбиркорликни энди бошлаётган ёшларга ҳам микро­кредитлар ажратиляптими?

— Ташқи иқтисодий фаолият Миллий банки мамлакатимизда Ёшларга оид давлат сиёсатини амалга оширишда фаол иштирок этиб, ёшларнинг бизнесга доир инновацион лойиҳаларини молиявий қўллаб-қувватлаяпти. Касб-ҳунар коллежлари битирувчиларининг ҳам тадбиркорлик ташаббусларини рағбатлантириб келмоқда.

— Шахсий ёрдамчи хўжаликларга-чи? Миқдори қанча?

— Бу борада ҳам талай ишлар амалга оширилмоқда, — дейди Ташқи иқтисодий фаолият Миллий банкининг Кредит департаменти бошқарма бошлиғи Файзулло ШАИСМАТОВ. — Ёрдамчи хўжаликларга қишлоқ хўжалиги маҳсулотларини етиштириш, чорвачилик, йилқичилик, туячилик, балиқчилик, паррандачилик ва асаларичиликни ривожлантириш, қуён боқиш ва етиштириш, иссиқхоналар ташкил этиш, уруғ ва кўчатлар сотиб олиш учун энг кам ойлик иш ҳақининг 100 бараваригача миқдорда микрокредитлар бериб бориляпти.

— Касб-ҳунар коллежи битирувчиларига ажратилаётган микрокредитлар миқдори қанча?

— Касб-ҳунар коллежи битирувчиси юридик шахс ташкил этмаган ҳолда фаолият юритаётган бўлса, энг кам ойлик иш ҳақининг 200 бараваригача миқдорда, агарда юридик шахс мақомига эга бўлса, энг кам ойлик иш ҳақининг 300 бараваригача миқдорда кредит маблағлари ажратиляпти.

— Микрокредитни қайтариш муддатлари-чи? Улар қандай белгиланади?

— Бунда муддат микро­кредит қарз олувчига кредит ажратилаётган лойиҳанинг ўзини ўзи қоплашини ҳисобга олган ҳолда белгиланади. Микрокредитлар фаолиятни бошлаш учун айланма маблағларни шакллантириш ва лойиҳасининг техник асосини ишлаб чиқиш учун 12 ой муддатга, қишлоқ хўжалиги маҳсулотларини етиштириш ва қайта ишлаш учун айланма маблағларни тўлдиришга, асбоб-ускуналар сотиб олишга 2 йил муддатгача, инвестиция лойиҳаларини молиялаштириш бўлса, 3 йилдан ортиқ муддатга берилмоқда.

— Микрокредит кимларга берилмайди?

— Зарар кўриб ишлаётган, ноликвид балансга эга қарз олувчиларга микрокредит берилмайди.

Нурбек ҒАФФОРОВ

ёзиб олди.