Бўш уйдан оқилона фойдаланиш сири

Бир-биридан чиройли, арзон ва энг муҳими, сифатли сумкалар тикадиган Дилдора Орифжоновани пискентликлар яхши танийди. Ишлаб чиқараётган маҳсулотларининг сифати чет элникидан қолишмас экан.

— Ишни сингилларим билан уйда сумка тикишдан бошлаганмиз, — дейди тадбиркор Дилдора Орифжонова. — Биримиз андоза олсак, иккинчимиз бичардик. Тикиш ва безак беришни кичик сингилларим эпларди. Уч ой ана шу тарзда ишладик. Маҳсулотимизни сотувга чиқариб, харидорларга маъқул келганидан ўзимиз ҳам қувондик. Секин-аста маҳсулотимизни харид қилувчилар ва буюртмалар сони кўпая бошлади. Шундан сўнг фаолиятимизни кенгайтирдик. Шу йилнинг январь ойида оилавий тадбиркор сифатида давлат рўйхатидан ўтдик.

Цехни ўз уйида очган тадбиркорнинг ақл билан иш кўриши «Бўш турган уйдан фойдаланиш ҳам вақтни, ҳам нақдни тежайди», деган гапидан маълум.

— Эрта тонгдан иш бошлаймиз. Тикувчи қизлар ўзимизнинг маҳалладан. Ишга келиб-кетишда муаммо бўлмайди. Тушликни ҳам шу ерда ташкил этганмиз. Хуллас, ҳамма шароит бор.

Дарвоқе, цехда касб-ҳунар коллежини тамомлаган беш нафар қиз доимий иш ўрнига эга.

— Бу ерда ишлайдиган қизларнинг барчаси интилувчан. Ижод қилишга уста. Дид ва маҳоратидан келиб чиқиб, сумка бичимини танлайди, безак беради. Бир-бирига ўхшамайдиган, чиройли маҳсулот харидорлар эътиборидан четда эмас. Чармдан тайёрланган маҳсулотлар пишиқ  бўлади, урфдан қолмайди. Асосийси, сифати юқори, нархи ҳам қиммат эмас. Фойдага келсак, бир миллион сўмлик хомашёдан тахминан 500 минг даромад қиламиз. Ишчилар ҳам яхшигина маош олади.

Тадбиркорлик кетидан опанинг  рўзғори бут, дастурхони тўкин. Даромаддан иккита янги тикув машинаси олган Дилдора опа келгуси режалари ҳақида шундай дейди:

— Ҳозир банкдан яна кредит олиш ҳаракатидамиз. Фаолиятимизни кенгайтириб, куз ва қиш мавсумига мўлжалланган чарм костюм ва плаш (сюртук) тикишни йўлга қўймоқчимиз. Бу режамиз амалга ошса, яна ўн нафар қиз доимий иш ўрнига эга бўлади.

Ноилахон АҲАДОВА