Акциядорлик тижорат «Ипотека-банк» томонидан кичик бизнес ва хусусий тадбиркорлик соҳаларини молиялаштиришга йил бошидан буён Қарийб 386 миллиард сўмдан зиёд кредит маблағлари ажратилди.

«Ипотека-банк»нинг Кредитлаш департаменти бошлиғи ўринбосари Фарҳод ИНОЯТОВнинг айтишича, банк филиаллари орқали хотин-қизларни тадбиркорликка жалб этиш ва улар фаолиятини қўллаб-қувватлаш мақсадида 70 миллиард 600 миллион сўмлик, сервис соҳасини такомиллаштириш учун эса 130 миллиард сўмлик кредит йўналтирилди.

— Аҳоли орасида ҳозир чорвачиликка кредит ажратмаётган экан, деган гапларни эшитиб қоламиз. Бу гапларда асос борми?

— Ҳеч қандай асос йўқ. Бу миш-мишдан ўзгаси эмас. Қорамол сотиб олиб, чорвачиликни ривожлантириш мақсадида ажратилаётган кредитлар тўхтатилган эмас.

— Дейлик, касб-ҳунар коллежи битирувчиси банкдан кредит олмоқчи бўлса, ундан иккита кафиллик сўралади. Шуни келгусида биттага туширишнинг иложи борми?

— Чиндан ҳам, коллеж битирувчисидан бизнес-режа, ариза ҳамда икки кишининг кафиллиги сўралади. Айтилган масала ҳозирда қайта кўриб чиқилмоқда. Яна бир гап, республикамизнинг барча ҳудудини қамраб олган 38 филиалга 56 касб-ҳунар коллежи бириктирилган. Банк ходимлари мазкур коллежларда бўлиб, битирувчиларга бизнес-режа тузиш ва бошқа масалаларда кўмаклашмоқда.

— «Ипотека-банк» томонидан бу йил қанча уй қурилади ва унга қанча маблағ йўналтирилади?

— Аҳолини уй-жой билан таъминлаш банкимизнинг асосий мақсади ҳисобланади. 2017 йилнинг ўзида 191 уй қурилади. Бунинг учун 850 миллиард сўм миқдорида маблағ ажратилган. Уйлар эса йил охирига қадар қуриб битказилади.

Ўз мухбиримиз