Ёз ойлари сабзавоткорлар учун жуда масъулиятли давр ҳисобланади. Негаки, эртаги муддатда экилган сабзавотлар, картошка ва бошқа бошоқли экинлар ҳосилини нест-нобуд қилмай, тезда йиғиб олиш талаб этилади. Чунки ерни такрорий экин учун тайёрлаш керак бўлади.

Такрорий экинлар ўз вақтида экилса ва парваришланса, албатта, кўзланган ҳосил қўлга киритилади. Эртаги ҳосилдан бўшаган ерларга кечки картошка, карам, сабзи, бодринг, ош лавлаги ҳамда кўкат сабзавотларни экиш мумкин. Юртимизнинг марказий қисмида жойлашган вилоятларда эртаги экилган сабзавотлар (картошка, ғалла ва бошқалар)дан бўшаган ер майдонлари июнь ойининг 1-2 ўн кунлигига тўғри келади. Бўшаган ерга такроран бодринг, сабзи, ош лавлаги ҳамда картошканинг ўртаги ва кечки навларини экиш тавсия этилади. Такроран кечки карам ва картошка учун тайёрланган жой олдин суғорилади. Ер етилгач, экишни бошлаш мумкин.

Аммо бунинг бошқа, сабзавоткорнинг ўзига боғлиқ бўлмаган томони ҳам бор. Бу —  об-ҳаво. Баъзи йилларда мавсум серёғин келиб ёки ҳарорат анча паст бўлиб, экиш муддати 12-15 кунгача кечикиб кетиши ҳам кузатилади. Лекин тажрибали деҳқонлар бундай вазиятда ҳам кўзланган ҳосилни қўлга киритишга муваффақ бўладилар. Бунинг учун агротехник тадбирларни ўз вақтида ва сифатли ўтказиш талаб этилади.

Июнь ойида экилган асосий экинлардан помидор, пиёз, бодринг, картошка; полиз экинларидан қовун, тарвуз, қовоқ, ўртаги карам майдонлари чопиб-юмшатилади. Шунингдек, бегона ўтларни йўқотиш, маданий ва маҳаллий ўғитлар бериш, вақтида суғориш, ўсимликларда пайдо бўлган касаллик ва зараркунандаларга қарши курашиш чоралари ҳам амалга оширилади.

Сабзавотчилик, полизчилик ва картошкачиликда йил давомида ойма-ой бажариладиган тадбирлар тақвимидан