— Корхонамда чакана савдо билан назорат-касса машинаси орқали фаолият юрита-миз. Тўлов терминалига эга эмасмиз. Яқинда туман давлат солиқ инспекцияси ходимлари текширув ўтказиб, тўлов терминали ўрнатилмагани туфайли корхонамни молиявий жаримага тортди.

Гарчи текширув туман давлат солиқ инспекцияси бошлиғининг буйруғи асосида амалга оширилган бўлса-да, уларда назорат органлари фаолиятини мувофиқлаштириш бўйича Республика Кенгашининг махсус рухсатномаси йўқ эди. Шу қонунийми?

Анвар ОЛИМОВ,

Тошкент шаҳри

— Президентимизнинг 2017 йил 15 февралдаги «Пул муомаласини янада такомиллаштириш ва банк пластик карточкаларидан фойдаланган ҳолда ҳисоб-китобларни ривожлантириш чора-тадбирлари тўғрисида»ги қарорига кўра, 2017 йилнинг 1 мартидан бошлаб давлат солиқ хизмати органлари томонидан тадбиркорлик субъектларини нақд пул маблағлари ёки пластик карталар бўйича тўлов шаклига қараб нархларни сунъий равишда ошириш ёки пасайтириш, назорат-касса машиналари, ҳисоб-китоб терминалларини ишлатиш, ўрнатилган тартибда талон ва чек бериш, нақд тушумни ўз вақтида ва тўла ҳажмда инкассация қилиш масалалари юзасидан ўтказиладиган текширувлар, назорат органлари фаолиятини мувофиқлаштириш бўйича Республика Кенгашининг махсус рухсатномасини талаб этадиган солиқ текшируви ҳисобланмаслиги белгилаб қўйилган.

Солиқ кодексининг 119-моддасига кўра, фискал хотирали назорат-касса машиналарини ва (ёки) тўловларни пластик карталар асосида қабул қилиш бўйича ҳисоб-китоб терминалларини ишлатиш мажбурий бўлгани ҳолда уларни ишлатмасдан савдони амалга оширганлик ва хизматлар кўрсатганлик, шунингдек, сотиб олувчига квитанция, талон, чек ёки уларга тенглаштирилган бошқа ҳужжатларни бериш мажбурий бўлгани ҳолда, бундай ҳужжатларни бермасдан товарларни реализация қилганлик ва хизматлар кўрсатганлик — энг кам иш ҳақининг ўттиз бараваридан эллик бараваригача миқдорда жарима солишга сабаб бўлади. Мазкур ҳаракатлар жарима қўлланилганидан кейин бир йил ичида такроран содир этилганда эса энг кам иш ҳақининг етмиш беш бараваридан юз бараваригача миқдорда жарима қўлланилади.

Шу билан бирга, 2017 йил 1 мартдан бошлаб чакана савдо ва хизматлар кўрсатиш соҳасидаги тадбиркорлик субъектлари сотилаётган товарлар нархини ҳамда кўрсатилаётган хизматлар ҳақини нақд пул ёки пластик карталар бўйича тўлаш шаклига қараб, уларни сунъий равишда оширса ёки пасайтирса, бу — пластик карталар бўйича тўловларни қабул қилишда ҳисоб-китоб терминалларидан фойдаланишдаги тартибни бузиш ҳисобланади. Шу боис уларга нисбатан энг кам иш ҳақининг ўттиз баравари миқдорида жарима солинади.

Абдували МАХАМАТОВ,

Шайхонтоҳур туман давлат солиқ

инспекцияси бошлиғи ўринбосари