юксак маънавият сари яна бир қадам

Китоб ўқиш, даврий нашрлар билан мунтазам танишиб бориш, кечаётган тезкор жараёнлардан бохабарликни бугун бир лаҳза ҳам канда қилиб бўлмайди. Буни англаб етган жондорлик фидойилар мутолаага ёндашувда яна бир янги қадамни қўйишди.

— Туманимиз аҳолисини илму маърифатга янада яқинлаштиришга, назаримда, ҳар биримиз масъулмиз, — дейди «Маҳалла» хайрия жамоат фонди Жондор туман бўлинмаси раиси Истам Юсупов. — Ёшларни китобхонликка қизиқтириш, бўш вақтларини самарали ташкил этиш, дунёқараши ва илм савиясини мунтазам ошириб боришда мутолаа учун яратилган қулай шароит асқатиши шубҳасиз. Шуни инобатга олиб, тумандаги ҳар бир маҳалла фуқаролар йиғинида кутубхона ташкил қилишни режалаштиряпмиз.      

Тумандаги «Жондор» маҳалла фуқаролар йиғинида шинам кутубхона  яқиндагина ташкил этилди. Маҳалла оқсоқоли Суҳроб Атоевнинг билдиришича, ушбу кутубхона аҳолини янада маърифатли қилиш мақсадида ташкил этилган.

— Кутубхона очиш ҳақидаги таклифимизни маҳалладошларимиз қизғин қўллаб-қувватлашди, — дейди оқсоқол. — Фуқароларимиз ўзлари ташаббус қилиб, кутубхонамизга китоблар келтириб беришди. Шу зайлда мингга яқин китоб жамланди. Уларнинг ҳар бирини рўйхатга олиб, ким қачон берганини ёзиб боряпмиз. Оилалардаги ижтимоий-маънавий муҳитни ўрганиш учун борганимизда кутубхонамиздан фойдаланишни ҳар бир оилага тавсия қиляпмиз. Фуқаролар кутубхонадан истаган китобни белгиланган муддатда ўқиб чиқиш учун олиб кетади ва ўқиб бўлиб яна қайтариб топширади. Хоҳлаганлар кутубхонанинг ўзида ўтириб ўқиши ҳам мумкин. Болалар учун бадиий, экциклопедик ва илмий адабиётларга қизиқиш катта.

Оқсоқолнинг билдиришича, келгусида «Энг фаол китобхон оила», «Энг китобсевар инсон» каби кўрик-танловлар ўтказиш режалаштирилган.    

Улуғбек ҚАЮМОВ