Оддийгина сэнд­вич егингиз келса нима қиласиз. Қўлингиздаги телефон орқали буюртма қилиш кифоя. Аммо унга кетадиган ҳамма масаллиқларни ўзингиз «нол»дан етиштирсангизчи?..

Энди Жорж исмли бир йигит тажриба тариқасида оддий сэндвич учун ҳамма масаллиқларни шахсан ўзи етиштиришга қарор қилди.

Бунинг учун тер тўкиб, буғдой ва сабзавот экди, ҳосилини ўзи йиғиб-териб, тегирмондан ун чиқарди. Кейин денгиз сувидан туз ажратиб олди. Бир муддат сигир соғди ва сутидан пишлоқ билан сариёғ тайёрлади. Орада асал ҳам йиғди.

Энди унинг учун энг даҳшатлиси ўз қўли билан товуқ сўйиш эди. Лекин айтганидан қайтмайдиган қатъиятли йигит журъат топиб, бунинг ҳам уддасидан чиқди.

Натижа шу бўлдики, «тадқиқотчи» Энди ўша оддий сэндвичнинг масаллиқларини «нолдан тайёрлаш» учун олти ой вақт ва 1500 доллар сарфлади.

Бу қизиқувчан йигитчани аҳмоқликда айблашингиз ёки беҳуда вақт сарфлаш дейишингиз мумкин. Хулосани эса ўзингизга қўйиб берамиз...