Дунёда пластик чиқиндилар муаммоси тобора долзарб тус олаётган бир пайтда, олимлар экологик тоза муқобил материаллар яратиш устида изланиш олиб бормоқда. Ана шундай янгиликлардан бири Мексикада яратилган кактус асосидаги биологик парчаланувчи пластикдир.

Университет тадқиқотчиси Сандра Паско Ортис тиканли нопал кактуси ширасидан фойдаланиб, атроф-муҳит учун хавфсиз бўлган пластик турини ишлаб чиқди. Мутахассисларнинг таъкидлашича, ушбу материал тупроқда қисқа муддат ичида парчаланади, сув муҳитида эса янада тез йўқолади.

Янги материалнинг асосий афзаллиги шундаки, у заҳарсиз бўлиб, инсон саломатлиги ва ҳайвонот олами учун хавф туғдирмайди. Шунингдек, у океан ва сув ҳавзаларида микропластик ифлосланишининг олдини олишга хизмат қилиши мумкин.

Олимлар мазкур ихтирони саноат миқёсида ишлаб чиқариш имкониятларини ўрганмоқда. Мутахассислар фикрича, бундай экологик тоза материаллардан кенг фойдаланиш келажакда пластик чиқиндилар ҳажмини камайтиришга муҳим ҳисса қўшади.

Манба: Forbes.