Бугун экологик муаммолар нафақат табиат, балки жамиятнинг маънавий қиёфасига ҳам бевосита таъсир кўрсатмоқда. Шу сабабли ёш авлод қалбида она заминга нисбатан меҳр ва масъулият ҳиссини уйғотиш – энг долзарб вазифа.

Бу жараёнда халқ вакиллари ва талаба-ёшлар ўртасидаги бевосита мулоқотлар алоҳида аҳамият касб этмоқда.

Низомий номидаги Тошкент давлат педагогика университетининг ҳарбий факультетида бўлиб ўтган учрашув шунчаки навбатдаги расмий тадбир эмас, балки келажак эгалари ва халқ вакиллари ўртасидаги самимий кўприкка айланди. Ўзбекистон Экологик партияси Тошкент шаҳар ташкилоти ташаббуси билан ташкил этилган «Раҳбар, депутат ва ёшлар» мулоқотида шаҳар ва туман Кенгаши депутатлари, соҳа мутахассислари ҳамда фаол талабалар бир даврада жам бўлишди.

Миллий ўзликни англаш, ёшлар тарбияси ва албатта, экологик масъулият масалалари суҳбат мавзуси бўлди. Шаҳар Кенгаши депутати Севара Файзиева шиддат билан ўзгараётган глобаллашув даврида ватанпарварлик фақат сўзда эмас, балки ҳар бир фуқаронинг ўз юрти табиати ва қадриятларига бўлган муносабатида акс этишини ҳаётий мисоллар билан тушунтириб берди.

Тадбир давомида «Яшил макон» лойиҳаси шунчаки кўчат экиш кампанияси эмас, балки аждодлардан мерос қолган табиатни асрашдек муқаддас бурчнинг замонавий кўриниши эканига урғу берилди. Туман Кенгаши депутати Гуласал Раҳмонованинг фикрича, экологик маданият ва миллий қадриятлар бир-бирини тўлдирувчи тушунчалардир. Зеро, ўз тупроғини севган инсон унинг ҳар бир қаричини асраб-авайлашга интилади. Очиқ ва баҳс-мунозараларга бой ўтган бу учрашув ёшларнинг ижтимоий ҳаётга бўлган қарашларини яна бир бор чархлаб, уларда эртанги кун учун дахлдорлик ҳиссини уйғотгани билан аҳамиятли бўлди.