Кениялик экофаол Труфена Мутони дарахтни 72 соат қучоқлаб турган ҳолда янги жаҳон рекордини ўрнатди. Шу тариқа у аввалги натижани ортда қолдириб, Гиннеснинг рекордлар китобига киритилди.

Уч сутка давомида 22 ёшли фаол дарахтни қўйиб юбормаган. Бу орқали у атроф-муҳитни муҳофаза қилиш муаммолари ва табиатга эҳтиёткор муносабатда бўлиш зарурлигига эътибор қаратган. Мутони шу тариқа Гана вакили Фредерик Боаке томонидан ўрнатилган ва 50 соатдан сал кўпроқ давом этган рекордни янгилаган.

Бу Мутонининг рекорд ўрнатишга биринчи уриниши эмас. 2025 йил февраль ойида у 48 соат дарахтни қучоқлаган ҳолда туришга муваффақ бўлган. Аммо бу сафар у ўз натижасини сезиларли даражада яхшилади.

Фаолнинг сўзларига кўра, унинг биринчи уриниши рамзий ишора бўлган. Иккинчи уриниши эса онгли мажбурият сифатида амалга оширилган. Дастлабки уринишга тайёргарлик жараёнида у қуруқ рўза тутган, сув истеъмолини камайтирган ва организмини узоқ вақт сувсиз қолишга мослаштириш учун машқ қилган. Бироқ иккинчи уриниш олдидан у соғлиқ учун хавфли бўлиши мумкинлигини англаб, бу усулдан воз кечган.