Рисолат МАҲКАМБОЕВА, меҳнат фахрийси:

— Билимдон инсоннинг имконияти китоб ўқимаганлардан кўра ҳар соҳада кенгроқ бўлади. Болада ёшлигидан китобга меҳр ўйғотиш — келажаги учун йўл кўрсатиш билан баробар. Бунинг учун ҳар бир ота-она, албатта, вақт ажратиб, фарзанди билан китоб дўконига бориши, болалар адабиётининг сара намуналаридан танлашга кўмаклашиши керак. Тўғри танланган китоб — яқин дўст кабидир.

Ўқитувчимизнинг уйига дарс тайёрлагани борардик. Бир каттакон хонаси тўла китоблар. Агар вазифани яхши ўзлаштирсак, истаган китобимизни олиб кетишимиз мумкин эди. Кўпроқ китоб олиш учун топшириқни муддатидан аввал бажариб борардик. Мактабни тамомлагандан кейин ҳам устозимни тез-тез йўқлаб турдим. Ҳануз шогирдларига китоб улашарди-ю, аммо хазинаси бўшай демасди... Йиллар ўтди, устозимиздан кейин бебаҳо хазинанинг тақдири нима бўлди экан, деб қизиқсам, набираси китобхонларга тарқатиб юборибди.

Устозим китобларнинг катта қисми амакисидан қолганини айтган эди. Ўзи ўқиган китобларни ҳам қўшиб, уларнинг сонини уч мингга етказган. Вафотидан олдин китобсеварларга истаган китобини беришни набирасига тайинлаган экан...