— Гоҳида бехосдан танадаги холга зарар етиб қолиши (юлиниши ёки кесиб олиниши) мумкин. Бундай пайтда нима қилиш керак?

Холида ЎРОҚОВА,

Қарши шаҳри

— Аввало, ваҳимага тушмай, қонни тўхтатиш учун тампонли бинтдан фойдаланиш керак, — дейди Тошкент шаҳридаги туманлараро 2-тери-таносил касалликлари диспансери шифокори Шаҳло ИСМОИЛОВА. — Жароҳат жойига водород пероксиди қўйиб, стерилланган боғич боғлаш талаб этилади. Бундай вазиятда, албатта, жарроҳга мурожаат қилиш лозим. Агар эҳтиёж туғилса, шифокор қолиб кетган хол бўлакларини олиб ташлайди. Бу жуда муҳим. Сабаби, хол қолдиқлари қонга қўшилса, бутун танага тарқалиб, саратон касаллигига олиб келиши ҳам мумкин. Хол юлингандан сўнг остидаги терининг ранги қорайса, қонаса ёки хол қайтадан катталашса, демак, у меланома. Бунда оғриқ кучсиз, аммо ёқимсиз бўлади.

Баъзида хол ноқулай жойда жойлашган бўлиб, кийимга ишқаланиб, илиниб  халақит қилади. Бунда иложи борича ундан халос бўлиш керак. Жарроҳ лазер ёки жарроҳлик тиғи (скальпель) ёрдамида уни бутунлигича олиб ташлайди ва қонга тушмаслигини назорат қилади. Холнинг олиб ташланиши қўрқинчли эмас. Аммо бу ишда турли зарарли оқибатлардан ҳимояланиш керак. Холга зарар етгандан сўнг, шишиб катталашса ва ноқулайлик туғдирса, дарҳол мутахассисга мурожаат қилинг. Бадандаги холлар ҳеч қандай сабабсиз қичишиб, ачиша бошласа, ранги ўзгариб қонаса ҳам шундай йўл тутилади.

Озода ВАЛИЕВА

ёзиб олди.