Ҳар куни инсон саломатлиги бебаҳо бойлик экани борасида кўплаб бонг урилади. Айниқса, соғлиқни сақлаш ходимлари оммавий ахборот воситаларида чиқишлар қилиб, турли хил тавсия ва маслаҳатларни бераётганига кўп дуч келамиз.

Бу жуда яхши, албатта. Инсон саломат бўлса, жамиятда барқарор ривожланиш омиллари кучаяди.

Одамзод учун танасидаги барча аъзолар соғлом бўлса – бу катта бахт. Айниқса, ҳаёт гўзалликларини кўриб, баҳра олишда аҳамиятли бўлган кўзни асраш жуда муҳим.

Албатта, кўз саломатлигини асрашнинг ўзига яраша тартиб-қоидалари мавжуд. Ана шулардан бири ўта майда ёзувларни ўқишдан сақланишдир.

Тиббиёт мутахассислари томонидан меъёрдан ортиқ даражада майда ёзувларни ўқиш кўзни зўриқтириши мумкинлиги кўп бора таъкидлаб келинади. Бироқ дорихоналарда сотилаётган ҳар бир дори-дармонни қўллаш йўриқномасини заррабин билан ҳам ўқиш амримаҳол. Йўриқномаларнинг ўта майда ҳарфларда ёзилганини кўриб, бу бир парча қоғоз шунчаки «борми – бор» қабилида, кимнидир овутиш учунгина қўйилган, деган хаёлга боради киши гўё. Соғлиқни сақлаш вазирлиги ҳузуридаги Фармацевтика тармоғини ривожлантириш агентлигининг «Дори воситаларини, тиббий буюмлар ва тиббий техника экспертизаси ва стандартлаштириш давлат маракази» ДУК томонидан тасдиқланган қатор йўриқномаларни ўқиб, танишиб чиққунча инсон кўзи ишкал топиб қолиши ҳеч гап эмас. Йўриқномалардаги услубий ва имло хатоларни-ку, умуман айтмаса ҳам бўлади.

Мамлакатимизда ҳар бир фаолият инсон ҳаётига хизмат қилиши кўп бора таъкидланади. Демак, шундай экан, соғлиққа зарар етказувчи ҳар қандай омил зудлик билан бартараф қилиниши зарур. Хусусан, дори-дармонлар йўриқномалари ҳам матн чоп қилиш ва уни тарқатиш стандартларига мувофиқ бўлса, айни муддао бўлар эди.

Қурбонбика ЎРОЗМЕТОВА,

Урганч шаҳри