Ўтган ҳафта давомида Бухоро вилояти Экология, атроф-муҳитни муҳофаза қилиш ва иқлим ўзгариши бошқармаси чўл ҳудудларида тунги рейд тадбирлари ўтказди.

Вилоятнинг Жондор тумани «Мохончўл» мавзеида ўтказилган ушбу рейдда икки нафар фуқаронинг табиатга жиддий зиён келтирганлиги аниқланди. Улар Қизил китобга киритилган саксовулни синдириб, ўзларининг «УАЗ» русумли атомобилида олиб кетаётганида ушланган. Ушбу ҳолат юзасидан ҳуқуқбузарларга нисбатан тегишли ҳужжатлар расмийлаштирилиб, атомашиналари жарима майдончасига жойлаштирилган.

Экопартия аъзоси Муҳаббат Сафоева матбуотда чиқишларидан бирида «Орол денгизининг қуриган ҳудудида – минглаб гектар ер майдонларига саксовул, юлғун ва жийда дарахтлари кўчатлари ва уруғлари экилди. Шу ўринда оғриқли бир савол пайдо бўлади: Бухоро ва Хоразм вилоятлари ўртасида ястаниб ётган

Қизилқум ёки Қорақум чўлларида юз йилдан буён бўй чўзиб турган саксовуллар, юлғунлар қани?

Улар нега кейинги 20-30 йил ичида бирдан ғойиб бўлиб қолди?» деб ёзган эди. Бу саволга юқоридаги рейд натижаси ҳам жавоб бергандек гўё...