​Эркин УСМОНОВ,

ёзувчи

...Савол туғилади: «Бизнинг китоб мутолаасига муносабатимиз қандай?», «Фарзандларимиз бугун «Учар гилам»лару «Тоҳир-Зуҳра» ё «Ёрилтош»ни билишармикан?».

«Муносабатимиз яхши, билишади», дегинг келади-ю, ўйланиб қоласан киши. Таассуфки, айрим ёшлар китобхонликдан анчайин йироқлашиб кетган...

Яқинда вилоятлардан биридаги коллежда бўлиб ўтган учрашувда талабалардан қандай китоблар ўқишаётгани ҳақида сўрадик. «Ўтган кунлар», «Робинзон Крузо», «Шум бола», «Гарри Поттер», «Шайтанат» ва ҳоказо» деган жавобни эшитиб хурсанд бўлдик. Кейин билсак, кўпчилиги ана шу асарларни улар асосида суратга олинган фильмлар орқали билишаркан. Энг зўр бадиий фильм ҳам ҳеч қачон китобнинг ўрнини боса олмайди. Китобнинг ўз нафаси, ҳиди ва қуввати бор. Демак, ҳаётни китобсиз тасаввур қилиб бўлмайди. Маънавиятимизнинг теран илдизлари, дунёнинг таянч нуқтаси, туриш-турмушимизнинг маъно ва мазмуни, энг аввало, китоблар билан муштарак бўлиб кетган...

Сўзим адоғида сизга шундай дегим келади: ўйлаб кўринг, охирги марта қачон кутубхона ё китоб дўконига кирдингиз? Фарзандларингиз ё невараларингиз учун қандай китоблар харид қилди­нгиз? Охирги ўқиган китобингизни эслай оласизми? Хонадонингизда шахсий ё оилавий кутубхонангиз борми? Унутмангки, бу саволларга жавоб бериш ҳеч қачон ҳеч ким учун кеч бўлмайди...