Осиё тараққиёт банки (OTБ) томонидан Марказий ҳамда Ғарбий Осиё ҳудудларида амалга оширилаётган лойиҳаларнинг 17 фоизи Ўзбекистонга тўғри келмоқда. Мамлакатимиз минтақада бу кўрсаткич бўйича иккинчи ўринда. Жорий йилда жами 3,5 миллиард долларга яқин миқдорда 25 та лойиҳа имзоланган.

Экология, атроф-муҳитни муҳофаза қилиш ва иқлим ўзгариши вазирилиги ахборот хизматининг маълум қилишича, вазир Азиз Абдуҳакимов ва Осиё тараққиёт банки Сув ва шаҳарсозликни ривожлантириш сектори катта директори Норио Саито билан учрашди. Учрашув давомида шаҳарларни комплекс ривожлантириш, экология соҳасидаги ходимлар малакасини ошириш, Япониядаги чиқиндини қайта ишлаш соҳасидаги компанияларни Ўзбекистонга жалб қилиш каби долзарб масалалар муҳокама қилинди.

Мулоқот чоғида Норио Саито 2025-2026 йилларга мўлжалланган «Қаттиқ маиший чиқиндиларни барқарор бошқариш» лойиҳасининг 2-босқичини бошлаш таклифини билдирди.

Шунингдек, давлатимиз раҳбари ташаббуси билан жорий этилган Экология, атроф-муҳитни муҳофаза қилиш ва иқлим ўзгариши вазирлигининг давлат-хусусий шерикчилик асосида амалга ошираётган ислоҳотларини қўллаб-қувватлашини таъкидлади.

Учрашув давомида шаҳарларни комплекс ривож­лантириш, экология соҳасидаги ходимлар малакасини ошириш, Япониядаги чиқиндини қайта ишлаш билан шуғулланувчи компанияларни Ўзбекистонга жалб қилиш каби долзарб масалалар муҳокама қилинди. Япониядаги чиқинди соҳасида етакчи компанияларни Ўзбекистонга жалб қилиш, соҳада Осиё тараққиёт банки томонидан инвестицияларни олиб кириш, грантлар ажратилиши ҳамда вазирлик ва қуйи ташкилотлар ходимларининг малакасини ошириш борасида ўзаро ҳамкорлик масалалари ҳам муҳокама қилинди.

Учрашув якунида Осиё тараққиёт банки Сув ва шаҳарсозликни ривожлантириш сектори катта директори Норио Саито Ўзбекистонда экология, атроф-муҳитни муҳофаза қилиш, қурғоқчиликка қарши кураш борасида амалга оширилаётган ишларни юқори баҳолади. ОТБ бу борадаги ҳамкорликни давом эттиришга тайёр экани қайд этилди.