Яқин дугонамнинг унаштирилганига ҳам уч йилча бўлди. Ҳали-бери тўйдан дарак йўқ. Куёв — университет талабаси. Дугонам эса ҳар йили абитуриентлик «гашти»ни суради.

Сўраганларга икки қуда ҳам «ўғлимиз ўқишини битириб олсин, қизимиз ўқишга кириб олсин, унаштирилган-ку, тўй қилиш қочиб кетармиди», дея жавоб беришарди. Дугонамдан сўрасам, жўяли бир гап айтмади. «Билмасам, қачон бўлади, куёв ўқимишли қиз оламан, деб туриб олган, мени эса, кўряпсан, ҳар йили ўқишдан «йиқиламан»,— деди совуққонлик билан.

Уч йил давомида олди-бердиларнинг кети узилмади. Куёвнинг туғилган куни, келиннинг туғилган куни, байрамлар… Хуллас, уч йилда барча байрам байрамдек ўтди. Тўй ҳақида эса на куёв томон, на келин томон ўйлади.

Бу йил ҳам дугонам таваккал, деб институтга ҳужжат топширди, омадми, билимми камлик қилиб, тўртинчи йил ҳам талаба бўлолмади.

Келин томон нима дейишни билмай қолди. Дугонам эса «энди нима бўлади, қуда томон ўқимишли қизни келин қиламиз дейишганди», — деди ўзини йиғидан тўхтатолмай.

— Майли, қўявер, қўлингда ҳунаринг бор, кам бўлмайсан. Кимдир касбли, кимдир ҳунарли бўлади, — дедим овутгандай бўлиб.

Ҳақиқатан ҳам дугонам айтганидек бўлди. Қуда томон ўқимишли йигит ўқимишли қизга уйланади, қачонгача кутамиз қизингизни, одам деган тўрт йилдан бери битта ўқишга кира олмайдими, дея унаштирувни бузди. Бу орада дугонамнинг дадаси бу кўргуликни кўтаролмай, тўшакка михланиб қолди. Бўлғуси куёвнинг ота-онаси ўғлини икки маҳалла наридаги ўқимишли қизга уйлантириб қўйишди. Маҳалла-кўй, қишлоқ одамлари фақат шу воқеа ҳақида гапираётгандек эди: «Йигит ўз бахтини топиб кетди, аммо қиз бечорага қийин бўлди…», «Бир айби бордир — унаштирув бузилган», яна шунга ўхшаш ёқимсиз гаплар билан қиз томонни роса ғийбат қилди.

Ҳа, ора-сирада бўлса-да, бундай хунук воқеалар учраб турибди. Обрўли хонадонга қиз узатяпман, деган ота-оналар қуда томонни яхшилаб суриштириб, маслаҳатлашиб, кейин тўй тараддудини бошласа, яна бир бахтли оиланинг ташкил топишига сабабчи бўлишади. Ахир, «маслаҳатли тўй тарқамас», деб бежиз айтишмаган-ку.

Севара ЎКТАМОВА,

Қашқадарё вилояти