«Инсонга эътибор ва сифатли таълим йили»да амалга оширишга оид Давлат дастурида аҳоли орасида соғлом турмуш тарзини шакллантириш ва жисмоний фаоллик даражасини оширишга алоҳида эътибор қаратилиб, бу борада тегишли вазифалар белгиланган.

Давлатимиз раҳбарининг «2030 йилгача бўлган даврда Ўзбекистон Республикасининг Атроф муҳитни муҳофаза қилиш концепциясини тасдиқлаш тўғрисида»ги ҳамда «Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида»ги фармонлари жамиятда жисмоний тарбия ва оммавий спорт билан мунтазам шуғулланиш ҳамда соғлом турмуш тарзи бўйича ҳаётий кўникмаларни шакллантиришда муҳим омил бўлиб хизмат қилаётир.

Куни кеча Олий Мажлис Қонунчилик палатасидаги Ўзбекистон Экологик партияси фракцияси ҳамда қуйи палатанинг Экология ва атроф-муҳитни муҳофаза қилиш масалалари қўмитаси ҳамкорлигида 7 апрель – Бутунжаҳон саломатлик кунига бағишлаб ўтказилган тадбирда шулар хусусида сўз борди.

– Бундан 75 йил аввал – 1948 йил 7 апрель куни Жаҳон соғлиқни сақлаш ташкилотига асос солинган. Бу инсон саломатлиги билан боғлиқ барча масалаларни халқаро даражада ҳал қилиш йўлида қўйилган муҳим қадамдир, – дейди Олий Мажлис Қонунчилик палатаси депутати Моҳира Хождаева. –  Ҳозир ЖССТга 194 та давлат аъзо бўлиб, Ўзбекистон ҳам 1992 йил 25 майдан мазкур мамлакатлар сафида. Кейинги йилларда мамлакатимизда жисмоний тарбия ва спортни оммалаштириш, аҳоли, айниқса, ёшлар ўртасида соғлом турмуш тарзини тарғиб қилиш, атроф муҳит мусаффолигини таъминлаш, санитария ва экологик ҳолатни яхшилаш орқали инсон саломатлигини муҳофаза қилиш борасида кенг қамровли ишлар амалга оширилмоқда.

Дунё бўйлаб CОВИД-19 коронавирус инфекциясининг тарқалиши барча мамлакатлари қатори Ўзбекистонда ҳам аҳолининг соғлиғи, жисмонан саломатлиги, соғлом ҳаёт кечириш даражаси заиф эканлигини кўрсатди. Юрак-қон томир ва нафас олиш йўллари касалликлари бор ҳамда ортиқча вазнли фуқароларда хасталик оғир кечди. Айрим ҳолларда ҳатто ўлим билан якунланди.

Бундан жиддий хулоса қилган ҳолда зарарли одатлардан воз кечиб, оммавий спорт билан доимий шуғулланиш, тўғри овқатланиш тамойилларига риоя қилиш, хусусан таркибида туз, қанд ва ёғ миқдори кўп бўлган ҳамда хамирли таом ва ширинликларни, нон маҳсулотларини меъёридан ортиқ истеъмол қилмасликни, умуман, соғлом турмуш тарзини кундалик ҳаётга айлантириш зарур эканлигини бугунги даврнинг ўзи тақозо этмоқда.

Шу билан бирга, табиат ресурслари билан боғлиқ ҳолатлар, жумладан, тоза ичимлик сув етишмовчилиги, атмосфера ҳавоси ифлосланиши, чиқиндиларнинг ортиши каби муаммолар ҳам инсон саломатлигига катта таъсир этадиган муҳим кўрсаткичлардан ҳисобланади.

Сўз олганлар сўнгги йилларда атмосфера ҳавосининг ифлосланиши даражаси ортиб бораётганини айтиб, бунга транспорт воситалари сони кўпаяётгани, саноат корхоналаридан атмосферага чиқарилаётган заҳарли газлар сабаб бўлаётганини қайд этдилар. Шундан келиб чиқиб, ёшларни спортга кенг жалб этиш, атроф-муҳит мусаффолиги, яшилликни асраш юзасидан тегишли вазирлик ва идораларга зарур таклиф ва тавсиялар берилди.