Шотландиядаги океан қирғоқларида ўлган китнинг ошқозонидан 150 кг. чиқинди топилди. Тадқиқотлар шуни кўрсатдики, денгиз жониворининг ўлимига у ютиб юборган жуда кўп миқдордаги чиқинди сабаб бўлган, дея хабар берди The Daily Mail нашри.

13 метрлик кит Крейгморе қирғоқларига чиқиб қолган. Унинг оғирлиги 30 тонна бўлган. Денгиз ҳайвонларини ҳимоя қилиш жамияти (MARS) мутахассислари денгиз жонивори табиий сабабларга кўра нобуд бўлмаган деган хулосага келишди ва текширув ўтказишди.

Маълумки, кашалотлар «чангютгич» каби овқатланадилар – улар оғизларини очиб, атрофдаги ҳамма нарсани ютиб юборишади. Шунинг учун, пластик кўпинча уларнинг ошқозонига осонгина жойлашади. Текширув чоғида китнинг ошқозонидан балиқчилар тўри, арқон, қўлқоп ва пластмассадан тайёрланган турли буюмлар топилган. Олимларнинг хулосасига кўра, чиқиндиларнинг ошқозонда тўпланиши китнинг тўлиқ озиқланишига тўсқинлик қилган ва у «секин ва оғриқли», ҳолдан тойиб вафот этган.

«Китнинг ўлими инсоннинг океан ва денгизларни чиқиндилар билан тўлдираётгани нақадар жиддий муаммо эканлигини яна бир бор эслатди», — дейди MARS бу ҳақида.