Беҳи мевасининг шифобахшлиги қадим-қадимдан маълум. Кўп мамлакатлардаги халқ табобати вакиллари қадимда пиширилган ва қайнатилган беҳи мевасидан ошқозон-ичак касалликларини даволашда, меъда фаолиятини яхшилашда фойдаланишган.

Беҳи юрак ўйноғи, сариқ ва ичкетар касалликларини даволашда ижобий натижалар бериши аниқланган.

Қирғичдан ўтказиб, сувда қайнатиб пиширилган беҳи мевасини жигар касалликлари ва кўнгил айниш, қайт қилишнинг олдини олишда истеъмол қилиш фойдалидир. Беҳининг янги пишган меваси ва шарбати камқонликда, ич кетиш ва қон кетиш билан боғлиқ меъда-ошқозон йўллари касалликларида, пешоб ҳайдовчи восита сифатида ва юрак-қон томир касалликларида истеъмол қилиш тавсия этилади.

Беҳининг янги узилган меваси таркибида темир моддаси кўп бўлгани учун камқонлиликнинг олдини олиш ҳамда уни даволашда истеъмол қилинади. Буюк бобокалонимиз Абу Али ибн Сино ошқозон-меъда фаолияти бузилганида, унинг меваси шарбатини асал ва сирка қўшиб ошқозонни қувватлантириш ва заиф жигарни даволаш мақсадида истеъмол қилишни тавсия этган. Шунингдек, беҳини юз терисини тиниқлаштирувчи яхши восита эканини таъкидлаган.

Беҳи мевасидан дамланган чой йўталда ва нафас йўлларининг ўткир шамоллашида ҳам истеъмол қилинади.