Ўзбекистон Журналистлар уюшмаси ва Ёзувчилари уюшмаси ўзаро ҳамкорликда сўнгги пайтларда юртимизда ижод қилиб, ўзидан муносиб маънавий мерос қолдирган истеъдодли журналистлар ва салоҳиятли адиблар хотирасини абадийлаштириш мақсадида қатор лойиҳаларни амалга оширмоқда.

Таниқли журналист ва шоир, марҳум Тоҳир Шомуродовнинг «Мен ёнингдан йироқман» номли китоби тақдимоти ҳам ана шу хайрли ишнинг мантиқий давоми бўлди.

Моҳир журналист, иқтидорли ижодкор Тоҳир Шомуродов агар ҳаёт бўлганида бу йил 43 баҳорни қарши олган бўлар эди. Ижодкор ҳаёти давомида эълон қилган юзлаб мақолаларида сиёсий-ижтимоий ҳаётнинг оғриқли нуқталарини, оддий одамларнинг мураккаб муаммоларини чуқур таҳлилий-танқидий тарзда акс эттирган. У ҳар доим ҳаётнинг синчков кузатувчиси эди. Кичик ишдан ҳам катта фалсафий мақолалар чиқара олар эди.

Тоҳир Шомуродов қаламига мансуб ва «Янги китоб» нашриётида чоп этилган «Мен ёнингдан йироқман» тўпламида турли йилларда журналистнинг матбуот нашрларида чоп этилган туркум мақолалари саралаб киритилган. Китобдан  қўлёзма шаклида сақланган айрим шеърлари ва ҳикоялари ҳам ўрин олди. Шунингдек, «Ўзбеккино» томонидан «Тузоқ» бадиий фильми, «Тулкивойнинг тавбаси» мультфильмлари, «Суянч», «Рефери», «Ярашув институти», «Тошкент – ислом маданияти пойтахти» номли ўнлаб ҳужжатли фильмлари ҳам киритилди. Рус шеъриятидан таржималари тўпламнинг мазмунан бойитишга хизмат қилди.

Содда ва равон тилда ёзилган ижод намуналари ёшларда ватанпарварлик ва эл-юртига садоқат ҳиссини уйғотиши, маърифий савияси билан ҳам таъсирчан аҳамиятга эгадир.