«Маҳалла» хайрия жамоат фонди томонидан

анъанавий тарзда ўтказиб келинаётган ҳамда мазмун-моҳияти ва аҳамияти йилдан йилга тобора ортиб бораётган «Энг намунали фуқароларнинг ўзини ўзи бошқариш органлари» танлови маҳаллалар фаолиятини такомиллаштириш, тизим фаолларининг билим ва малакасини ошириш, улар ўртасида илғор тажрибаларни кенг оммалаштиришда муҳим аҳамият касб этяпти.

Куни кеча Самарқанд шаҳрида «Гўзал ва бетакроримсан, муқаддас Ватаним, жоним сенга фидо, Ўзбекистоним!» шиори остида мазкур танловнинг республика босқичи ўтказилди. Маҳалланинг жойларда маънавий муҳит барқарорлиги ҳамда миллатлараро дўстлик ва ҳамжиҳатликни мустаҳкамлаш, ёшларни миллий истиқлол ғоясига садоқат руҳида тарбиялаш, аҳолини ижтимоий қўллаб-қувватлаш каби ўттиздан ортиқ кенг кўламли вазифаларини самарали йўлга қўйиш борасидаги билим ва тажрибалар яна бир бор ўзига хос синовдан ўтказилди.     

Жорий йилнинг апрель — май ойларида ўтказилган танловнинг туман (шаҳар) босқичида 9764 та фуқаролар йиғини иштирок этган бўлса, Қорақалпоғистон Республикаси, вилоятлар ва Тошкент шаҳар босқичида туман (шаҳар) босқичида ғолиб бўлган 193 маҳалла қатнашди. Улардан энг муваффақиятли 14 таси республика босқичида қатнашиш ҳуқуқини қўлга киритган эди. Самарқандда бўлиб ўтган якуний босқичда ана шу маҳалла фаоллари ўзаро беллашди. 

Бугун мамлакатимиз бўйича 10 мингга яқин маҳаллаларда 36 мингдан зиёд ходимлар фаолият кўрсатяпти. Янгиланиб бораётган давр улар олдига янги-янги долзарб ва муҳим вазифалар қўймоқда. Уларнинг ҳар бирига ўз вақтида жавоб топиш ҳамда амалиётга жорий қилиш билан кимнингдир мушкулини осон қилиш масъулияти маҳаллада хизмат қилаётган ҳар бир ходимни жиддий ўйлантириши табиий. Ана шундай ўткир ҳаётий масалалар танловнинг ҳар бир шарти негизига сингдирилган эди. Танлов шартларида иштирокчилар ўз соҳаси бўйича етарли билим, малака ва кўникмага эга бўлиш, ҳозиржавоблик, уддабуронлик, ташкилотчилик каби қирраларини намойиш этишди.

Танлов жойларда маънавий муҳит барқарорлигини таъминлаш, миллий қадриятларни кенг тарғиб қилиш, оила институтини янада мустаҳкамлаш, аҳоли, аввало, ёшлар ўртасида соғлом турмуш тарзини кенг қарор топтириш, жамиятда маҳалла институтининг аҳамиятини кенгайтириш, нуфузини янада ошириш бўйича ўзаро тажриба алмашишда, айниқса, фойдали бўлди. 

Танловнинг якуний натижаларига кўра, Наманган шаҳридаги «Фурқат» маҳалласи учинчи, Пайариқ туманидаги «Мустақиллик» маҳалласи иккинчи ҳамда Навоий шаҳридаги «Бун­ёдкор» маҳалласи биринчи ўринга лойиқ деб топилди. Ғолиблар диплом ва махсус қимматбаҳо совғалар билан тақдирланди.