Уч йил илгари «давлат сири» иши бўйича беш йил қамоққа ҳукм қилинган Қозоғистон президенти администрацияси раҳбарининг собиқ ўринбосари Баглан Майлибаев муддатдан аввал озодликка чиқди.
 

Пойтахт Жиноят-ижро тизими департаменти (ЖИТД)нинг хабар қилишича, Баг­лан Майлибаев Нур-Султондаги тергов изоляторидан 30 май куни озод қилинди ва Нур-Султон шаҳрига юборилди. Майлибаев ўзига берилган муддатни адо этмасдан озод қилинди. У яна бир йилу тўрт ой 21 кун жазо муддатини ўташи керак эди, дея ойдинлик киритди ЖИТД.
Баглан Майлибаев 2017 йил 12 январь куни президент администрацияси раҳбарининг ўринбосари лавозимидан озод қилинди. Бир неча кундан кейин миллий хавфсизлик қўмитаси Майлибаевни «Давлат сирларини қонунга зид равишда тўплаш, тарқатиш ва ошкор қилиш» моддасида кўзда тутилган жиноятлари учун уни қамоққа олгани маълум бўлган эди.
Майлибаев устидан суд ёпиқ режимда ўтган ва мол-мулки мусодора қилиниши билан беш йил муддатга колонияга ҳукм этилиб, давлат идораларида ишлаш хуқуқидан умрбод маҳрум бўлган эди.