«Тўшагинг қандай бўлса, уйқунг ҳам шундай бўлади», деган ибора бежиз айтилмаган.

Аммо эрталаб уйқуга тўйиб уйғониш нафақат ўрин-кўрпага, балки бошқа кўплаб омилларга ҳам боғлиқ. Қуйидаги тавсиялар яхши ва тиниқиб ухлашга ёрдам беради:

1 Ухлашдан икки-уч соат олдин овқатланинг. Агар қорнингиз очса, ярим стакан қатиқ ичинг ёки бир-икки бўлак ёғсиз пишлоқ енг. Ўта тўқ қоринга ҳам, оч ҳолда ҳам ухлашга ётманг.

2 Кечки овқатга сутли ва сабзавотли таомлар яхши. Лекин ўткир зираворлар, аччиқ ва шўр нарсалардан тийилиш лозим.

3 Камҳаракат одамлар (кун бўйи ўтириб ишловчилар)нинг уйқуга ётишдан аввал очиқ ҳавода 20-30 дақиқа сайр қилиши фойдадан холи бўлмайди.

4 Кун охирида ақлни зўриқтирадиган ишлар билан шуғулланманг.

5 Уйқу олдидан компьютер ўйинларини ўйнаш ёки кучли ҳиссий таъсирга эга кино-кўрсатувлар кўриш мумкин эмас.

6 Доимо бир вақтда ётиб, бир вақтда уйғонишга одатланинг.

7 Янги узилган кашнич, салат (коҳу) баргларини овқат билан бирга истеъмол қилинг. Улар «уйқу чақирувчи» ҳисобланади.

8 Қайнатилган ошқовоқни асал билан аралаштириб, ухлашдан 1-2 соат аввал истеъмол қилиш ҳам ижобий таъсир қилади.

Уйқусизлик аслида касаллик эмас, лекин мунтазам давом этса, организмни ҳолдан тойдириб, жиддий хасталикларга туртки бериши мумкин.

Дилроз АБРАЕВА

тайёрлади.