Ҳар бир синовдан яхшилик қидириш азалдан халқимизга хос фазилат. Дунёнинг кўплаб мамлакатларини хавотирга солган коронавирус балоси бизни ҳам четлаб ўтмаяпти. Шундай синовли дамларда элнинг қиёфаси, ҳар бир инсоннинг кимлиги яққол билинади. Бундай балони даф этишнинг йўли эса бирлашиш, ҳар ким ўз вазифасини сидқидилдан бажариши жуда муҳим. Шифокорлар: «Биз сизнинг саломатлигингиз учун ишдамиз, сиз уйда қолинг» дея қайта ва қайта халқимизга айтаётгани бежиз эмас. Демак, уйда қолиб ҳаммамиз ўзимизни, оиламизни ҳимоя қилайлик. Шу энг катта ёрдамимиз бўлади аслида.
 

Биз ҳам оила даврасида ўтириб китоб мутолаа қиляпмиз. Шайх Муҳаммад Содиқ Муҳаммад Юсуфнинг «Мукаммал саодат йўли» китобини харид қилганимга анча бўлувди, бироқ ўқишга улгурмаган эдим. Фурсатдан фойдаланиб шу ажойиб китоб мутолаасига киришдим. Ҳақиқатда инсониятнинг энг тўғри йўли қандай бўлиши кераклиги, бизни ҳар қандай ёмонликлардан нима асрай олиши теран таҳлил этилган.
Шайх ҳазратлари китобда шундай ёзади: «Исломда иймоннинг қадр-қиммати қанчалик юқори эканини яхши биламиз. Поклик иймоннинг ярмига тенг­лаштирилганидан ҳам Ислом дини озодалик, поклик ва тозаликка қанчалар эътибор берганини билиб олсак бўлаверади. Бу ўз навбатида биз мусулмонларни динимиз талабига яраша бўлишга чақиради.
Инсон соғлиги учун поклик қанчалар долзарблигини, соғлик эса ўз навбатида инсон бахт-саодати учун қанчалар зарурлигини инсоният энди англаб етмоқда. Аллоҳнинг охирги ва мукаммал дини қиёматгача боқий қолувчи дини, барча замонлар ва маконларда инсониятга икки дунё саодат йўлини кўрсатиб берувчи дини – Исломда покликнинг бундан ўн тўрт аср илгари ибодат даражасига кўтарилиши, бошқа ибодатларнинг қабул бўлишига покликнинг шарт қилиниши илоҳий мўъжизадан бошқа нарса эмас.» Мана шу жумлаларнинг ўзиёқ дунё аҳли бугун коронавирус балосига ягона тўсиқ сифатида поклик ва тозаликни кўраётгани бежиз эмаслигини ифодалаб турибди.
Оилавий китобхонлигимиз ақл чархи – шахмат билан ҳамоҳанг ўтмоқда. Китоб ўқишдан танаффус қилганимизда оилавий шахмат мусобақасини давом эттиряпмиз. Мусобақа совринига ҳам албатта китоб қўйилган.
Сиз ҳам оилангиз даврасида қолинг ва китоб ўқинг. Бу вақтдан нафақат унумли фойдаланиш, балки келажагимиз бўлган фарзандлар ҳаёти учун мустаҳкам пойдевордир.

Ҳусниддин БЕРДИЕВ