Алишер Навоийнинг беш достонни ўз ичига олган “Хамса” асари озарбайжон тилига таржима қилинди.

Мазкур таржимани Боку давлат университети туркология кафедраси мудири, филология фанлари доктори, профессор, Бобур номидаги халқаро мукофот совриндори Рамиз Асқар амалга оширди.

Рамиз Асқар узоқ йиллардан бери ўзбек мумтоз адабиётини тадқиқ этиб келади. У айни пайтга қадар Заҳириддин Муҳаммад Бобурнинг “Бобурнома” асари ва бир қатор ғазалларини, Ҳусайн Бойқаро девонини озарбайжон тилига таржима қилган. Алишер Навоий ижодини узоқ йиллардан бери тадқиқ қилиб келади. У узоқ йиллардан давомида туркийлар орасидаги маънавий кўприк сифатида туркий халқларга мансуб бўлган қирқдан ортиқ асарларни турк, татар, қозоқ, қирғиз, ўзбек ва бошқа қатор тиллардан озарбайжон тилига таржима қилган.

Олим “Хамса” асари таржимаси давомида, яъни 2017 йилдан буён ўзбекистонлик навоийшунос олима Дилнавоз Юсупова билан ҳамкорлик қилди. Дилнавоз Юсупова ушбу таржиманинг асосий муҳаррирларидан ҳисобланади.

— “Хамса” асари туркий тилнинг қорлуқ лаҳжасида ёзилган, — дейди таржимон. — Озарбайжон тили эса ўғуз лаҳжасига мансуб. Шу нуқтаи назардан, бу асар таржимасида бир қанча мураккабликларга учрадик. Айниқса, вазн билан боғлиқ қийинчиликлар кўп бўлди. Талабчан муҳарриримиз Дилнавоз Юсупованинг ёрдами билан таржима жараёни самарали якунланди.

Олимнинг қайд этишича, шу кунга қадар Алишер Навоийнинг “Фарҳод ва Ширин” достонигина озар тилига бармоқ вазнида таржима қилинган эди. Энди озарбайжонлик китобхонлар буюк шоирнинг “Хамса”сидан тўлалигича ўз она тилида ўқиш имконига эга бўлди.

Мазкур ишни муваффақиятли амалга оширган Рамиз Асқар Ўзбекистон Ёзувчилар уюшмасининг фахрий аъзолигига қабул қилинди.