​— Тишимни эрталаб ва кечқурун тозалайман. Шунга қарамай, назаримда, сариқ тусга кириб бораётгандек.

Тишни тоза тутиш учун яна нималарга эътибор бериш зарур? Оғиз ҳидланмаслиги учун-чи? Уй шароитида тишни соғломлаштириш учун нималардан фойдаланган маъқул?

Нигора ҚУЛИМОВА,

Қўшкўпир тумани

— Қоидаси бўйича, тишларни кунига икки марта ювиш керак, — дейди стоматолог-шифокор Дилфуза ЧИНПЎЛАТОВА. — Одатда, тишлар овқат тановулидан кейин ювилиши шарт. Бундан ташқари, кўпчилик тиш ювилган пайтда тилни тозалашни эсдан чиқаради. Аслида тиш ювилган пайтда, тиш чўткасининг орқаси билан тилни ҳам тозалаш керак. Чунки овқат қолдиқлари тилнинг устидаги кўринмас қобиқда яширинган бўлади. Агар тозаланмаса, оғиз бўшлиғининг ҳидланишига олиб келади. Тиш чўткаси ўртача қаттиқликда бўлиши керак. Ўта қаттиғи милкларга зарар етказади, юмшоғи эса яхши тозаламайди. Тиш чўткасини ҳар уч ойда алмаштириб туриш керак, шамоллашдан тургандан сўнг, албатта, янги тиш чўткаси олиш лозим. Акс ҳолда, унга ўрнашиб олган микроблар касалликни қайта қўзғаши мумкин. Тиш пастаси танлаганда унинг таркибида фтор ва калций мавжуд бўлганини танланг. Бу тишнинг мустаҳкамланишига ёрдам беради. Агар оғиз бўшлиғингизда нохуш ҳид сезсангиз, ялпиз чайнанг. У барча ёмон ҳидларни йўқотиш хусусиятига эга. Шунингдек, сутли маҳсулотлар, сабзавотлар ва мевалар кўп истемол қилиш тишни соғломлаштиришда жуда зарур. Агар тиш шамоллаб оғриб қолса, истеъмол содасини илиқ сувга солиб чайиш керак. Шунингдек, мойчечак, исириқ ва мармарак дамламаси ҳам оғриқни қолдиради. Генгивит — милк шамоллаши ва пародонтитда эман пўстлоғи қайнатмаси ёрдам беради. 

Гўзал СОЛИЕВА

ёзиб олди.