Франция президенти Эммануэль Макрон «сариқ нимчалилар» ҳаракати номини олган намойишчилар акцияси талабларига жавобан, халқига телемурожаат билан чиқди. Мамлакатда «Фавқулодда иқтисодий вазият» эълон қилинди, дея хабар тарқатди euronews.

«Мен ҳукумат ва парламентга инсонларнинг ишлаб топган пулига яхши яшашини таъминлаш учун барча зарур чора-тадбирларни кўриш юзасидан кўрсатма бераман. 2019 йилнинг бошидан ойлик минимал иш ҳақи миқдори иш берувчиларнинг ҳеч қандай харажатисиз 100 еврога оширилади...», деди президент.

Шунингдек, «кўп ишлаган — кўп топади» ғояси ҳаётга қайтарилиб, хизмат вақтидан ташқари қўшимча меҳнат учун иш ҳақи солиққа тортилмаслиги ваъда қилинди. Иш берувчиларнинг жорий йил охиригача ходимларига берадиган мукофот пуллари ҳам солиқдан озод этилади.