Қозоғистонда 15-19 ёшлилар орасида йил бошидан буён 30 нафар кишининг ОИТСга чалиниш ҳолати қайд этилган.

— Балоғат ёшида ОИТСга чалиниш ва энг даҳшатлиси, уларнинг 90 фоизи касалликни жинсий йўл билан юқтириши умумий эпидемиологик жараёнга кескин таъсир ўтказувчи улкан муаммо қаршисида турганимизни билдиради, — деди Қозоғистон ОИТСга қарши курашиш ва профилактика маркази директори Бауыржан Байсеркин ушбу мавзуга бағишланган матубот конференциясида.

Tengrinews.kz хабарида айтилишича, Қозоғистонда балоғат ёшида ҳомиладорлик кўрсаткичи қўшни давлатларга нисбатан анча юқори. Бу, ўз навбатида, касалманд чақалоқлар туғилишига, уларнинг отасиз ўсишига, қизлар эса жамиятда ўз ўрнини топа олмасдан, ўз жонига қасд қилиш ҳолатлари ошишига олиб келмоқда. Бундай салбий ҳолатларнинг олдини олиш мақсадида соғлиқни сақлаш вазирлиги 16 ёшга кирган қизларнинг ҳомиласини ота-онанинг розилигисиз туширишни қонунийлаштириш масаласини кўтариб чиққан.