Япония ҳукумати Тожикистонда 2019 — 2022 йилларда соғлиқни сақлаш давлат дастури доирасида режалаштирилмаган ҳомиладан сақланиш мақсадида контрацепция воситалари учун 2,5 миллион доллар ажратади. ​​​​​​​

Бу ҳақда мамлакат соғлиқни сақлаш вазирлигининг репродуктив саломатлик миллий маркази раҳбари Мунира Ғанизода маълум қилди.

Соғлиқни сақлаш вазирлиги хориж гранти асосида мамлакатда бола туғилиши орасидаги фарқни 3 йилга етказишга умид қилмоқда. Бу ҳам бола, ҳам она саломатлигини таъминлайди, дейилади News.tj хабарида.

Яқинда Жаҳон банки Тожикистон иқтисодиётини ривожлантиришга тўсиқ бўлаётган молиявий омиллар қаторида, туғилишнинг ҳаддан ортиқ юқорилигини ҳам кўрсатиб ўтди. Ҳақиқатдан ҳам мамлакатда туғилиш кўрсаткичи Марказий Осиё давлатлари ичида биринчи ўринда туради. 2018 йилда Тожикистон аҳолиси сони 9 миллион 150 мингдан ошди.