Кўпчилик аёллар озишнинг энг самарали йўли — парҳезни танлашади. Парҳез натижа бериб озишади-ю, аммо удан кейинги қоидаларга амал қилмай яна тез кунда вазн тўплашни бошлашади. ​​​​​​​

Парҳез якунлангани билан ортиқча вазнга қарши кураш ҳали тугамайди. Энди меъёрни сақлаб қолиш учун ҳаракат қилиш лозим. Чунки шунча пайт керак бўлган озиқавий қувватни организм қаердан бўлса ҳам тиклаб олишга интилади.

Кучли назорат

Парҳез — овқатланишдаги турли бефойда одатларимизни ўзгартириш учун яхши имконият. Чунки ундан кейин ошқозонимизга тушаётган егулик миқдори камаяди ва ўз вақтида овқатланишга одатланамиз. Натижада эса ошқозон кичраяди. Агар яна аввалги кўринишингизга қайтишни истамасангиз, тановул қилаётган егулигингиз миқдорини назорат қилишдан тўхтаманг.

Шошилманг

Овқатланишдан олдин сиз учун керакли ва емасангиз ҳам бўлаверадиган маҳсулотларни ажратиб олинг. Маълумотларга қараганда, шошилиб овқатланадиганлар тўқлик ҳиссини кечроқ сезишар экан.  Яхши чайналмаган егулик эса ошқозонни янада зўриқтиришда давом этади.

Ошқозонни оч   қолдирманг

Баъзи аёллар парҳезни овқатдан чекиниш деб тушунишади. Аммо бу нотўғри қараш. Кам-камдан тез-тез ейилган таом сизга ноқулайлик туғдирмайди. Шуни унутмангки, одам оч қолганда мияга «хабар» келади ва ошқозон егулик сўрайди. Шундай пайтда овқатланмаслик ошқозон ўзини ўзи «ейиш»ига олиб келади.

Юқори кайфият

Гўшт, музқаймоқ, шоколад ёки ёқтирган маҳсулотлардан ўзингизни бутунлай чеклаб қўйманг. Чунки бундай маҳсулот сизга ёқади ва уни тановул қилганингизда кайфиятингиз кўтарилади. Бунда фақат меъёрга амал қилсангиз бас!

Дилфуза ТИЛЛАЕВА

тайёрлади.