Қирғизистонда таълим соҳасида мактаб дарсликларини яратишнинг амалдаги тизими жамоатчилик томонидан танқид қилинмоқда. Журналистлар 5-6 синф дарсликларида юзлаб хато аниқлаб, оммага ошкор этган.

Хатоликлар мавжуд 33 номдаги дарслик хусусий нашриётлар томонидан нашрга тайёрланиб, 3 миллион нусхада чоп этилган. Таълим ва фан вазири Гулмира Кудайбердиеванинг маълум қилишича, ушбу дарсликлар ҳудудлардаги 56 та мактабда синовдан ўказилиб, ижобий тақриз олингандан сўнг чоп этишга рухсат этилган.

— Аввал дарсликлар яратишга ихтисослашган «Мектеп» давлат нашриёти бор эди. Кейинчалик бу тадбиркорлар қўлига топшириб қўйилди. Улар эса камхаражат йўлни маъқул кўрмоқда, — дейди Қирғизистон академияси президенти Абакир Мамитов.

«Дарсликни нашрга тайёрлашда муҳаррир, мусаҳҳиҳ ўқиганми ёки ўз хулосасини берган 56 та мактаб мураббийлари қаёққа қараган? Бу оммавий чаласаводликми ёки бепарволик?..» дейилади 24.kg хабарида.