Қирғизистоннинг Ўш шаҳридаги рус тилида таълим берувчи мактаблар уч сменада ишламоқда. Бир синфда ўқувчилар сони 60 нафаргача етган. Yntymak.kg сайти ёзишича, фуқаролар орасида фарзандини рус тилида таълим берувчи мактабларга ўқишга беришга талаб кескин ошган.

«Синфимга 54 ўқувчи қабул қилинган. Бу баъзи синфларга нисбатан яна ҳам оз. Ўтган йили 61 нафар болани 4-синфдан чиқардим. Шаҳарликлар-қишлоқликлар, русча билган-билмаган, боғчага борган-бормагани барчаси рус синфларга боласини беради. Синфда икки ҳисса кўп ўқувчи бўлгани билан дарс соати 45 дақиқалигича қолган», дейди тажрибали ўқитувчи Любовь Зубкова.

Хабарда Ўш шаҳар таълим бошқармаси бош мутахассиси Бектурсун Қўқоновнинг таъкидлашича, аксарият ота-онани синфда 60 ўқувчи сони ташвишга солмайди. «Дарсни яхши ўзлаштира олмаса ҳам майли, фақат русча сўзлашни ўрганса бас...», дегувчилар ҳам учрайди.