Тожикистонда Қурбон ҳайити байрами куни аҳоли ўртасида дабдабабозлик ва исрофгарчиликка йўл қўймаслик ҳамда бозорларда нархнинг сунъий ошиб кетишининг олдини олиш мақсадида махсус рейдлар ўтказилади. Бу ҳақда TajikTA расмий телеграф агентлиги хабар тарқатди. 

Дин ишлари қўмитаси миллий урф-одатларда ҳашам ва дабдабабозлик олдини олиш мақсадида ҳайит кунлари тўкин дастурхон ёзган, ортиқча исрофгарчиликка йўл қўйган фуқаролар катта миқдорда жаримага тортилиши ҳақида огоҳлантирди. Жарима миқдори жисмоний шахслар учун 5 минг сомони (тахминан 530 АҚШ доллари) миқдорида белгиланди.

Қўмита расмийлари аҳолига байрамда камтарона дастурхон тузаш, уй бекалари томонидан мазали таомлар тайёрлаш, шунингдек, столни қимматбаҳо экзотик ва цитрус мевалар билан эмас, ўз ҳовлисидаги маҳаллий мева ва сабзавотлар билан безашни маслаҳат берган.