Ҳомиладор аёллар энди икки босқичдан иборат бўлган перинатал (туғруққача) скрининг текширувидан ўтказилади.

Бу Адлия вазирлигида давлат рўйхатидан ўтказилган «Ҳомиланинг соғлиғи ва яшаб кетишига имкон бермайдиган туғма нуқсонлар билан болалар туғилишини олдини олиш тартиби тўғрисида»ги низомда белгиланган.

Ҳужжатга кўра, ҳомиладор аёллар икки босқичдан иборат бўлган перинатал (туғруққача) скрининг текширувларидан ўтказилади. Бундан кўзланган мақсад ҳомиланинг соғлиғи ва яшаб кетишига имкон бермайдиган туғма нуқсонлар ва ирсий касалликлар билан туғилишнинг олдини олишдан иборат.

Биринчи босқичдаги текширув уч мартали мажбурий оммавий перинатал ультратовуш текширувларини ўз ичига олади.

Ушбу текширув натижаларига кўра, хавф-хатар гуруҳига кирган ҳомиладор аёллар «Она ва бола скрининг» марказларида иккинчи босқичдаги текширувлардан ўтказилади.

Ҳомилада туғма ривожланиш нуқсонлари ва ирсий касалликлар мавжуд бўлганда ҳомиладор аёл тиббий-генетик хулоса билан тегишли бирламчи тиббий-санитария ёрдами муассасалари ва идоравий поликлиникага юборилади.

Мазкур ҳолат ҳақида ҳомиладор аёл ва унинг яқин қариндошларига, жумладан, туғилгандан сўнг чақалоқ соғлиғи ва ҳаётига таъсири, даволаш усуллари ва улар билан боғлиқ хавф-хатар даражаси, қўллаш мумкин бўлган тиббий муолажалар ва уларнинг оқибатлари ҳамда даволаш натижалари тўғрисида тўлиқ ахборот берилади.

Ҳомиладор аёл ва яқин қариндошларининг қарори асосида тегишли тартибда чора-тадбирлар амалга оширилади.