Норин туманидаги ўнта маҳалланинг кутубхонасига 4 мингга яқин адабиёт тақдим этилди.

Наманган вилоят ҳокимлиги, Ўзбекистон истеъмолчилар ҳуқуқларини ҳимоя қилиш жамиятлари федерацияси, Хотин-қизлар қўмитаси, Фуқароларнинг ўзини ўзи бошқариш органлари фаолиятини мувофиқлаштириш бўйича Республика кенгаши бошқаруви, Маънавият ва маърифат маркази томонидан жамланган асарлар маҳалла китобсеварларига етказиб берилди.

Туманнинг Сузоқовул маҳалласининг ихчам қилиб безатилган кутубхонасига 400 та адабиёт тантанали равишда топширилди. Бу ерда бир пайтлар маҳалла кутубхонаси бўлган, бироқ эгасиз қолгач, фонди ҳам, ўзи ҳам тугаб битган эди. Хайрли ташаббус билан гўша яна файзли ва одамлар гавжум масканга айланмоқда.

— 2018 йилда туманимизда бўлиб ўтган «Ёш китобхонлар» танловида 2-ўрин соҳиби бўлдим. Она тили ва адабиётдан фан олимпиадасида ҳам қатнашдим, — дейди 22-ўрта мактаб битирувчиси Муаззам Ҳайдаралиева. — Йил бошидан буён 56 та китоб ўқиб чиқдим. Ўқиш тафаккурни оширади, муомала маданиятимизни шакллантиради, инсонлар қалбига йўл топа оламиз. Телефон ва интернетдан кўра китоб ўқиш фойдалироқ, деб ҳисоблайман. Онам мактабда кутубхоначи бўлиб ишлайдилар. Келган ҳамма янги адабиётларни бирма-бир қолдирмай ўқиб чиқаман. Бугун маҳаллага келтирилган китобларни ҳам мутолаа қилмоқчиман. Май ойида туманда ўтказилган инновацион саммитда ўз лойиҳам билан иштирок этган эдим. Режамга кўра, катта синф аълочилари кичик синфдаги ўзлаштириши паст ўқувчиларни мактабда алоҳида хонада тўгарак ташкил қилган ҳолда ўқитишади. Қуш тилини қуш билади, ёш болалар тилини ҳам ёш ўқувчилар яхши билади. Бу жараёнда китоб ўқиб бериш ва мутолаа жараёнлари бирламчи ўрин тутади. Китоб энг яқин дўст, ҳамроҳ. Йиғлаётганингда овутадиган, йўлингда йўлдош, мададкордир. 2017 йилда Моҳинисо опа Республика «Ёш китобхон» танловида ғолиб бўлиб, «Спарк» автомобилини олганида жуда ҳавас қилгандим. Мен бунга қодир эмасманми, деб ўз-ўзимга савол бердим. Ўзим ҳам бу йил маҳалламиз ёшлари учун «Муаззам китобхонлар клуби»ни очмоқчиман.

— Бугун маҳалламизда маънавият байрами, десак, муболаға қилмаймиз. Ажримларнинг 95 фоизи маънавиятсизлик оқибатида, жиноятларнинг аксарияти китоб ўқимасликдан келиб чиқади, — дейди Сузоқовул маҳалласи хотин-қизлар билан ишлаш ва оилаларда маънавий-ахлоқий қадриятларни мустаҳкамлаш бўйича мутахассис Шоирахон Зокирова. — Бу йил маҳалламизга ўнта келин тушди. Уларни оилага тайёрлаш, касбга ва фойдали меҳнатга ўргатиш, эр-хотин ва қайнона-келин муносабатлари бизнинг бирламчи ишимиз. Бу борада бизга, аввало, китоб ёрдамчи. Маҳалламизда ҳозир 25 та алимент тўловчи бор. ­Эътибор беринг, ажрашган йигитларнинг 10 таси уйланган, 3 таси ҳамон сўққабош. Қизларнинг эса бирортаси қайта турмушга чиқмаган. Улар билан суҳбатларимиз чоғида арзимаган сабабларга кўра ҳаётини барбод қилганидан пушаймонлиги сезилади. Аммо қолипдан кўчган ғиштни, синган чиннини тузатиб бўлмайди. Лекин биз ушбу мисоллардан сабоқ чиқаришимиз, янги хатоларга йўл қўймаслигимиз зарур. Ҳар бир хонадонга китоб кириб бориш чораларини кўриш ҳаракатидамиз. Бизга фойдали китоблар ниҳоятда зарур. Ушбу мўъжаз кутубхонамизда «Китобхон қайноналар клуби»ни ташкил этиш ғоям бор. Чунки қайноналар ва келинлар китоб ўқиган оилада маънавият, албатта, устун  бўлади.

Китоб берилди, шу билан ҳаммаси ҳал бўлди эмас. Маҳалладаги китоб соҳасини яхши тушунадиган ва ишсиз юрган шахс ҳақ тўланадиган жамоат ишларига жалб этиш асосида кутубхонага бириктирилди. Демак, маънавият даргоҳининг ўз эгаси бўлади. Китоблар сони эса муттасил бойитиб борилади.

Лазиз РАҲМАТОВ