Китоб тарғиботига қаратилган ҳар бир иш замирида эзгу мақсадлар ётади. Бир кишининг бўлса-да, китоб ўқишига эришиш маънавиятли инсонлар сафини бир нафарга ошириш дегани.

Китоб мутолааси ва китобхонлик маданиятини ошириш бугун давлат сиёсати даражасига кўтарилгани бежиз эмас. Чунки глобаллашув ва ахборот-коммуникация технологиялари қанчалик тараққий этмасин, инсон тафаккури ва дунёқарашини кенгайтиришда китобнинг ўрнини боса олмайди. Президентимизнинг 2017 йил 13 сентябрда қабул қилинган «Китоб маҳсулотларини нашр этиш ва тарқатиш тизимини ривожлантириш, китоб мутолааси ва китобхонлик маданиятини ошириш ҳамда тарғиб қилиш бўйича комплекс чора-тадбирлар дастури тўғрисида»ги қарори бу борадаги эзгу ишларга қанот бағишлади.

Куни кеча Мудофаа вазирлиги Чирчиқ олий танк қўмондонлик-муҳандислик билим юртида «Китоб дунёси» маърифат маскани иш бошлади. Қисқа вақт ичида қуриб битказилган ушбу мўъжазгина дўконда ҳарбий хизматчилар ва уларнинг оила аъзолари, билим юрти курсантлари учун кенг ассортиментдаги китоблар тақдим этилмоқда. Ижтимоий-сиёсий, маданий-маърифий ва бадиий-публицистик йўналишда қарийб 300 номдаги 2 минг 500 донадан зиёд китоблар жамланган.

— Бу китоб маскани ҳарбийлар учун ажойиб туҳфа бўлди, — дейди Чирчиқ олий танк қўмондонлик-муҳандислик билим юрти бошлиғи ўринбосари Акром Шоҳакимов. — Офицер ва курсантлар кутубхонамиздан, асосан, ўз касбига оид китоблардан фойдаланади. Бу ердан эса бадиий, маърифий китоблардан баҳраманд бўлаётгани қувонарли. Ҳар куни оиласи даврасига бир дона китоб олиб бориши мумкин.