Ўзбекистон Миллий кутубхонасида психолог Зебинисо Аҳмедованинг «Психолог маслаҳатлари» туркумидан жой олган китоблари тақдимоти бўлиб ўтди.

Тақдимоти ўтказилаётган китобларнинг долзарблиги, уларнинг ҳар бири маълум бир психологик муаммони олиб чиққани, инсон шаклланишида уларнинг муҳим ўрни муҳокама қилинди.

«Насияга олинган бахт ёҳуд тушкунликдан чиқиш сирлари» китоби «Тушкунликка тушмаслик учун нима талаб қилинади?», «Тушкунликдан халос бўлишнинг қандай йўллари бор?» каби саволларга атрофлича жавоб бериб, китобхонни тушкунликдан чиқишнинг ўзига хос усулари ва йўл-йўриқлари билан таништиради. «Келин ва куёв танлаш санъати» бўлажак келин-куёв, қайнота ва қайноналарга мўлжалланган бўлиб, унда муаллиф ўзининг ҳаёти давомида кўрганлари, билганлари, ўқиганлари ва эшитганларини таҳлил этиш баробарида маслаҳатлар беради. «Оила бренди» китобида бренд тушунчаси, унинг оилага нисбатан қўлланилишини талқин қилиш баробарида инсоннинг оила ва жамият ҳаётида тутган ўрни, бахтли бўлиш сирлари ва мавқега эга бўлиш омиллари ҳақида батафсил ҳикоя қилинади. «Оила дипломатияси» китобида оиланинг муқаддаслиги, оилавий муносабатларда дипломатиянинг ўрни ҳақида сўз боради.

Ўзбекистон Миллий кутубхонаси матбуот хизмати